BAUCAU – Arguidu Jerónimo Correia Guterres hetan kastigu tinan 30 ba kadeia tanba provadu komete krime violasaun seksuál ba menór no krime ofensa ba integridade fízika simples – violénsia doméstika – hasoru nia oan feto rasik na’in rua, ne’ebé iha momentu krime hirak ne’e akontese ho idade tinan 17 no tinan 16.
Liu hosi leitura akórdaun hosi Tribunál Distritál Baucau (TDB), ne’ebé fó sai iha loron-10, fulan-novembru, tinan-2016, Jeronimo Correia Guterres hetan kondensaun iha primeira instánsia ho pena únika prizaun durante tinan 30 tuir art°.172°, art°.173° al. a) no d), ho forma agravasaun tanba lezada na’in rua nia oan rasik tuir art.° 182° n°. 1 al. d) Kódigu Penál nian, ho tan tuir art.° 145.°, n.° 1, Kódigu Penál nian konjugadu ho art.° 2°, n.°1 no 2, al. b) no c), art.° 3.°, al. c), art. 35.°, al. b) no art. 36° Lei kontra Violensia Domestika nian.
Tuir faktus ne’ebé provadu iha akuzasaun ne’ebé aprezenta husi Ministériu Públiku katak iha loron no fulan haluha ona, tinan 2012,haleu oras tuku 10:00 dadersan lezada hela iha uma iha postu administrativu Venilale, Baucau, ho tan nia alin nain rua, depois arguidu haruka nia alin nain rua ne’e ba halimar do’ok tiha mak arguidu bolu fali lezada hodi tama ba kuartu laran no obriga nia tenke halo relasaun seksuál ho arguidu. Depois liu tiha semana ida arguidu halo tan fali ba dala rua, arguidu haruka lezada ba to’os atu ke’e kumbili, lezada lakohi maibé nia ama haruka tanba dehan se lezada la ba to’os orsida nia apa/ arguidu atu baku nia. To’o fatin ne’ebá, arguidu obriga lezada ho ai hit sa’e atu baku depois haruka lezada hasai nia roupa hotu no obriga lezada tenke halo relasaun seksuál ho nia. Liu semana ida, arguidu repete fali hahalok ne’e.
Aleinde ida ne’e, no tanba lezada halai sai subar hodi arguidu labele obriga nia halo relasaun seksuál, arguidu lori ai baku lezada kona iha lezada nia matan no kotuk laran kauza nia matan kanek,moras no bubu iha kotuk laran.
Liu tiha fulan ida iha tinan 2013, arguidu ba ta’a ai haruka lezada tuir arguidu hodi ba tutur tuir ai, to’o iha fatin neba arguidu haruka lezada hasai hotu nia roupa unika faru makl lahasai depois arguidu hatoba lezada iha rai leten hafoin arguidu hasai nia penis hodi hatam ba lezada nia vajina laran halo movimentu tun-sae to’o esperma sai tama hotu iha lezada nia vajina laran. Lezada ho nia alin tenta halai sai hosi uma ba família seluk nia uma tanba tauk arguidu ninia hahalok, maibé liu tiha fulan ida arguidu ho lezada nia inan mai lori fali sira ba uma. Arguidu halo obriga lezada iha relasaun seksuál ho nia dala ida tan no lakleur nia haruka lezada ba servisu iha parteira hodi fase roupa hamos uma laran no tein, ikus mai mak haree katak lezada isin rua.
Iha loron-5, fulan-agostu, tinan-2015, lezada ida seluk, mós arguidu nia oan feto, hetan abuzu seksuál hosi nia dala rua, arguidu ameasa se nia lakohi halo relasaun seksuál ho nia nia atu baku mate lezada.
Tanba la kontente hahalok arguidu nian ne’e maka lezada sira na’in rua se’es an hodi ba hela fali nia avo sira. Depois lezada sira hamutuk ho nia avo no mane ba aprezenta keixa ne’e iha Polísia. Julgamentu ba kazu ne’e hala’o husi kolektivu hosi juis sira, preside hosi Dr. Afonso Carmona, ho tan Dr. José Gonçalves no Dra. Ersilia de Jesus. Ministériu Públiku reprezenta hosi Dr. Alfonso Lopez no arguidu hetan asisténsia legál hosi Defensoria Públika. (Media PJR)