DILI ─ Sesta, loron-13, fulan-Juñu, tinan-2019, Prokuradór-Jerál Repúblika Dr. José da Costa Ximenes hala’o enkontru ho Koordenadór Autoridade Inspesaun no Fiskalizasaun ba Atividade Ekonómiku no Sanitária (AIFAESA I.p.), Sr. Abílio Oliveira Serano ho ninia ekipa iha Gabinete Prokuradória-Jerál Repúblika.

Objetivu hosi enkontru ida-ne’e mak atu informa kona-ba servisu  sira AIFAESA nian, ne’ebé iha mós ligasaun balun ho servisu sira Ministériu Públiku nian, liuliu kona-ba  sasán no hahán ne’ebé vendedór sira fa’an ne’e ninia prazu liu tiha ona, inklui mós  hato’o sira-nia lamentasaun relasionadu ho atuasaun  PDHJ nian tanba halo inkéritu ba sira-nia funsionáriu ho laiha koñesimentu ruma hosi Koordenadór (AIFAESA I.p.), Abílio Oliveira Serano.

Iha enkontru ne’e, Koordenadór AIFAESA I.p. Abílio Oliveira Serano hato’o katak AIFAESA hanesan órgaun ekonómiku ida, no oras ne’e daudaun seidauk iha laboratóriu, ita haree katak agora ne’e ema barak mak hetan moras oioin tanba mai hosi hahán sira ne’ebé kontaminadu makas ho produtu sira kímiku nian, tanba ne’e, laboratóriu ne’e importante tebtebes ba AIFAESA, sira mós seidauk iha armazein hodi rai produtu sira ne’e, inklui produtu alimentár ho produtu la’os alimentár. Ba produtu alimentár bele so’e ka hakoi tiha, maibé produtu  la’os alimentár nian presiza fatin hodi rai no hein to’o iha desizaun hosi tribunál, tanba ne’e AIFAESA presiza armazein ne’e.

Iha biban ne’e, Koordenadór AIFAESA mós hato’o lamentasaun kona-ba atuasaun  PDHJ nian ne’ebé bolu ninia funsionáriu hodi halo inkéritu, nune’e, ikus mai Koordenadór AIFAESA hato’o katak ida-ne’e la’os keixa, maibé ida-ne’e denúnsia kalunioza tanba uza argumentu falsu hodi hatún AIFAESA nia kredibilidade, tanba durante ne’e sente katak AIFAESA nia servisu la’o ho di’ak hela laiha buat ida mak ladi’ak entre funsionáriu sira. (Media/MP)