Dili-Kinta, loron-09, fulan-dezembru, tinan-2021, Adjunta Prokuradór Jerál Rpúblika Dra. Remizia de Fátima da Silva, orador ba semináriu Komemorasaun Loron Mundiál Anti-Korrupsaun ho tema, Papel Ministériu Públiku iha Anbitu Prevensaun no Kombate Korrupsaun, iha salaun CNE.

Korrupsaun nu’udar fenómenu perigozu ida ne’ebé harahun valor fundamental moris iha sosiadade nia laran, korrupsaun halo monu aliserse Estadu-de-Direitu-Demokrátiku, dudu no hafahe riku-soin nasaun nian ba dalan laloos, haburas divisionismu iha sosiadade nia laran.

Objetivu husi Komemorasaun loron Mundiál Anti-Korrupsaun ne’e hodi, Promove no mobiliza partisipasaun públiku liuhusi hamoris konsiensia koletivu kona-ba luta kontra korrupsaun nu’udar responsabilidade síviku husi sidadaun no elementu sosiál hotu-hotu. Haforsa koñesimentu ajente públiku sira hodi kontribui ba implementasaun Governasaun di’ak ba prevene no kombate korrupsaun.

APJR hateten iha ninia aprezentasaun kata, korrupsaun sobu baze sosiedade nian,  tanba ne’e tenke kombate firmeza no kualker sosiedade ne’ebé hakarak dezemvolve, ho forma almonioza, tenke halo esforsu ida atu hahalok aat korrupsaun nian labele sai grave liu se lae bele ameasa sosiedade tomak.

Nune’e mós APJR hatutan liutan katak, iha  tinan-2020, prosesu tama ona iha Gabinete Sentrál Konbate Korrupsaun no Kriminalidade Organizada prosesu hamutuk 190, husi prosesu hirak ne’e 66 relasiona ho krime hirak ne’ebé komete durante hala’o knaar públiku sira ( jenerikamente dezignadu nu’udar krime korrupsaun nian) no prosesu seluk hamutuk 121 laiha espresaun seluk ne’ebé di’akliu, ho krime komun nu’udar krime organizadu.

APJR akresenta liutan katak, iha parte prevensaun no luta kontra korrupsaun  depende ba vários autores sira seluk nia investigasaun, primeiru ita tenke iha kuadru normative ida ne’ebé adekuadu ba kombate korrupsaun ida ne’e, no hau bele hatete katak, iha parte ida ne’e ita iha Lei ne’ebé sufisiente. Loos duni, ita nia nasaun ratifika ona konvensaun internasionál Nasoins Unidas nian kontra Korrupsaun, no hirak ne’ebé importante liu relasionadu ho korrupsaun no kriminalidade koneksu.

Iha eventu  Komemorasaun loron Mundiál Anti-Korrupsaun ne’e partisipa husi, Adjunta-PJR Dra. Remizia de Fátima da Silva, Presidente Komisaun Funsaun Públika, Faustino Cardoso Gomes, Eis-Primeiru Ministru, Rui Maria Arújo, Presidente Konsellu Imprensa Timor-Leste, Virgílo da Silva Guterres, Diretora JSMP, Ana Paula Marçal, no Madre Guilhermina Marçal, no autoridade municipal sira. (Media PJR)