Dili, Loron-19, fulan-Outubru, tinan-2023, Adjuntu Prokuradór Jerál Repúblika (APJR), Dr. Jacinto Babo Soares ohin entrega lista naran ofisiál justisa hamutuk 78 ba Asian Development Bank (ADB) hodi tuir formasaun ne’ebé mak sei fasilita hosi ADB.
Hafoin entrega tiha lista ofisiál justisa sira ne’ebé atu tuir formasaun ne’e, Dr. Jacinto Babo ho ADB diskuti uitoan konaba kestaun tempu, fatin no loron realizasaun nian, nune’e tuir planu, fahe ba grupu 5, kada grupu ema nain-16, hodi tuir formasaun konaba violénsia bazea ba jénereu, ne’ebé sei realiza iha fulan-Marsu, tinan-2024, nune’e Adjuntu rekomenda ba ADB atu fasilita formasaun fazeadamente ba ofisiál justisa hotu tanba sira nia servisu sempre hetan rotasaun.
Lista ne’ebé Dr. Jacinto Babo entrega ba ADB ne’e simu direta hosi konsultora Espesialista iha área kapasitasaun jurídiku no judisiária, Juiza, Robyn Layton ho Samar Minallah Khan iha Palm Bussiness and Trade Center, Surikmas.
Husik tiha formasaun, ADB mós aprezenta ba APJR konaba meius sira oinsá atu asegura nafatin vitima, testamuña no suspeitu sira, baihira tuir prosesu investigasaun iha Ministériu Públiku ka iha Tribunál, nune’e ADB iha ona dezeñu ka modelu ida ne’ebé bele fasilita servisu Tribunál ho MP nian iha futuru, hare tiha dezeñu APJR mós apreseia tebes ba inisiativa ADB nian ne’ebé nafatin fó apoiu ba seitór justisa iha Timor-Leste, (Média MP).