Dili, Loron-07, fulan-Marsu, Tinan-2024, Adjunta Prokuradora Jerál Repúblika (APJR), Dra. Angelina J. Saldanha, halo vizita kortezia ida ba Polísia Sientífika Investigasaun Kriminál (PSIK) no vizita ne’e hanesan pedidu audiénsia ida hosi Adjunta rasik, tanba durante simu posse hanesan APJR hodi toma responsabiliza ba Gabinete Sentrál Kombate Korrupsaun no Kriminalidade Organizada, foin ba dala uluk halo vizita ba PSIK.
Entretantu iha vizita ne’e, Adjunta-PJR ho Diretór PSIK, Dr. Vicente Fernandes e Brito, diskuti mos konaba andamentu prosesuál balun ne’ebé Ministériu Públiku (MP) delega ba PSIK, tanba MP iha konfiansa ba PSIK liu-liu prosesu sira ligadu ba krime sientifiku nian, ho nune’e Adjunta PJR vizita hodi haree direita kondisaun laboratórium sira ne’ebé instala ona iha edifísiu PSIK ne’ebé durante ne’e uza hodi kompleta prosesu investigasaun no prova sira.
Iha vizita ne’e mos oinsá atu hametin liu tan liña koordenasaun servisu entre instituisaun rua ne’e, tanba ne’e Adjunta PJR husu ba investigadór PSIK nian atu mantein komunikasuan di’ak ho majistradu sira iha Gabinete Sentrál Kombate Korrupsaun no Kriminalidade Organizada.