Dili, Loron-17, fulan-Novembru, Tinan-2023, Adjuntu-Prokuradór Jerál Repúblika (A-PJR), Dr. Nelson de Carvalho, halo abertura ba treinamentu Violénsia Bazeia ba Jéneru (VBJ) iha Uma Amérika Universidade Nasionál Timor-Lorosa’e (UNTL).
Iha abertura A-PJR rekoñese kontribuisaun importante ne’ebé Juventude fó tiha ona ba luta rezisténsia nian no mós bele fó ba konsolidasaun unidade nasionál, rekonstrusaun, defeza no dezenvolvimentu nasaun nian.
Violénsia Bazeia ba Jéneru nudár assuntu ida importante tebtebes, tanba tuir dadus estatístiku sira ne’ebé hatudu iha relatóriu ikus-ikus ne’e kona-bá atividade sira Ministériu Públiku nian no VBJ nudár flajelu sosiál ne’ebé presiza enfrenta hodi fó importánsia primordiál ba prevensaun espesialmente ba joven feto-mane no labarik sira.
Entretantu A-PJR mós konsidera oportunu no haksolok ba inisiativa hosi Assosiasaun Juventude Hakbi’it Justisa Timor Leste (AJHJ-TL), hodi realiza formasaun ba asosiadu sira atu nune’e bele iha ferramenta ne’ebé permite atu kompriende fenóminu sosiál grave ida ne’e no kriminál hodi fó kontribuisaun respetivu atu bele muda situasaun kriminalidade violénsia bazeia ba jéneru.
Nune’e konkorda katak rekursu umanu nudár ativu ida boot iha nasaun ne’ebé de’it, no liliu ba nasaun ida joven hanesan ita-nian ne’ebé atu bele supera dezafiu ba dezenvolvimentu fundamentál mak kapasita tebes rekursu umanu. Maibé mós importante mak Estadu presiza hala’o dezenvolvimentu ba projetu sira, atu husi inisiativa polítiku ka privadu diriji ba agresór sira hodi konsensializa sira atu adota komportamentu ida la violénsia, (Media MP).