DILI ─ iha Tersa, loron-12, fulan-Marsu, tinan-2019,
Adjuntu Prokuradór-Jerál Repúblika Dr. Alfonso Lopez reprezenta
Prokuradór-Jerál Repúblika Dr. José da Costa Ximenes, marka prezensa hodi fó
surpreza iha loron aniversáriu Uma Mahon Casa Vida.

Iha
loron espesiál ida-ne’e, Uma Mahon Casa Vida hamutuk ho labarik oan ki’ak sira,
vítima sira, parséiru, doadores no instituisaun sira ne’ebé mak durante ne’e servisu
hamutuk hodi fó asistensia ba Uma Mahon Casa Vida selebra ninia loron aniversáriu
ba dala sanulu resin-ida (XI).

Uma Mahon
Casa Vida harii hosi Sra. Simoa hó nia kaben hosi Brazileiru, ho inisiativa ida
katak labarik barak maka sofre ba krime oioin, liuliu krime violénsia seksuál hasoru
labarik feto sira ho tinan ne’ebé sei ki’ik, iha momentu ne’ebá organizasaun ida-ne’e harii tiha ho kondisaun ida ne’ebé
 ladún sufisiente, hahú ho buat foun ida ho ninia desafiu ne’ebé boot tanba la iha doadór no  parseiru
ruma hodi tulun, maske nune’e  ho esperansa
no konfiansa boot hosi organizasaun ne’e hamutuk ho ninia
ekipa ema timoroan na’in-lima de’it,  buka
dalan atubele sustenta ezistensia Uma Mahon ne’e liuhosi hato’o proposta hodi
husu tulun ba Ministériu Solidariedade Sosiál no ikusmai hetan duni proposta pozitivu.

Hafoin
liutiha tinan-11 Casa Vida
bele haree ona rezultadu ida ne’ebé di’ak, ohin-loron
ita bele haree katak la’os de’it
pesoál sira Uma Mahon nian mak prezensa
iha-ne’e, maibé bele haree mós husi labarik sira mak
husi Munisípiu sanulu resin-rua, hetan tratamentu ho dignu, hasai sira husi
sofrimentu ne’ebé sira hasoru. Uma Mahon Casa Vida halo ona servisu furak no ho valór boot.

Iha
loron aniversáriu Uma Mahon Casa Vida ba dala sanulu resin-ida (XI) ne’e, Adjuntu
Prokuradór-Jerál Repúblika Dr. Alfonso Lopez hato’o ninia diskursu katak durante tinan sanulu resin ida (11) Casa Vida tulun ona vítima labarik no adolesentes sira ne’ebé hetan agregasaun fizika no psikolojikamente husi ema ne’ebé tuir loloos proteze, kuida no hadomi labarik no adolesentes sira.

Iha
biban ne’e, APJR
mós hato’o solidariedade ba sira hotu ne’ebé mak hetan ona tulun husi casa vida
tantu iha tempu uluk no mós agora, no konsege halakon sira-nia terus no hetan hikas
fali esperansa, fó forsa hodi konstrui sira-nia moris, no dala
barak justisa ladun fó-atensaun ba vítima sira, kestaun kona-ba vítima nian tenke koloka iha sentru preokupasaun justisa nian.

MP mós
sei reforsa nia papel hodi fo apoiu ba vítima
sira, nune’e prepara hela Lei
orgániku foun Ministériu Públiku nian no husi Proposta Projetu Lei ne’e sei kria gabinete ida, hodi fó apoiu ba labarik vítima sira ne’ebé moris
hela iha perigu nia laran.

Ikusliu,
ha’u hakarak hato’o katak Uma Mahon Casa Vida maka nu’udar fatin protesaun nian ne’ebé fo esperansa ba labarik no joven vítimadu sira, dala ida tan ha’u fó korajen dedikasaun jenerolojisidade no luta ba labarik
no joven sira. (Media/PJR)