Díli-Kinta,
loron-18, fulan-Jullu, tinan-2019, Adjuntu Prokuradór-Jerál Repúblika (APJR),
Dr. Alfonso Lopez ensera formasaun kona-ba Dezenvolve Forsa-Tarefas no
Investigasaun Proativu ne’ebé realiza hosi Embaixada Estadu Unidus Amerika
(EUA) iha Timor-leste. Formasaun ne’e
hala’o durante loron-3, hahú hosi loron-15 to’o 18, fulan-Jullu, tinan-2019 iha
Tower-Fatuhada.
Iha ninia diskursu Adjuntu-PJR hateten katak, “formasaun ne’ebé
daudaun ne’e ramata sai nu’udar asaun ida ho valór formativu ne’ebé aas tanba
ne’e ita tenke agradese Embaixada Estadus Unidus Amérika, iha Díli, asaun sira
hanesan ne’e, nia objetivu atu kapasita no kualifika atór judisiáriu, sai
nu’udar apoiu hirak-ne’ebé di’ak liu, ita-nia parseiru sira bele presta konsolidasaun
ba sistema justisa Timor nian, pilár fundamentál ida-ne’e ba konstrusaun pás,
ba dezenvolvimentu sosiál ho ekonómiku no ba konstrusaun estadu direitu
demokrátiku”.
Nia hateten liután katak “formasaun ne’e kona-ba temátika
ne’ebé atuál tebtebes ho importánsia prátika ne’ebé aas, iha mundu ida ne’ebé
markadu ho fenómenu kriminál ho potensiál ofensivu aas no kompleksu liu no
difísil atu investiga, esensiál atu organizmu oioin investigasaun kriminál nian
bele tau hamutuk esforsu, ho objetivu atu hetan efisiénsia no efikásia, ha’u la
iha dúvida katak formasaun ida-ne’e fó ba partisipante sira hanesan referénsia
ne’ebé di’akliu no instrumentu prátiku-teóriku ho importánsia krusiál”.
Iha sorin seluk, partisipante iha formasaun ne’e, hanesan
mós majistradu Ministériu Públiku nian, Dr. Rogeiro Viegas hateten katak
“formasaun ne’ebé realiza hosi EUA ne’e pozitivu tebtebes
tanba liuhusi formasaun ida-ne’e bele kapasita investigadór no Prokuradór sira kona-ba oinsá mak atu dezenvolve ekipa task force hodi bele servisu hamutuk ho proativu, nune’e mós hodi halo
investigasaun ba krime sira ne’ebé mak ho
kategoria krime organizadu hanesan; krime
trafiku umanu, krime korupsaun no brankeamentu kapitais”.
Formandu ne’e akresenta tan katak “iha formasaun ne’e
atu fahe de’it esperiénsia
kona-ba ekipa task force nian, tanba formadór sira mai husi investigadór ne’ebé kompostu husi FBI ho Polisia Federál, entaun,
formasuan ne’e kona-ba oinsá atu halo investigasaun kompreensivu ida bé kle’an,
atu nune’e hodi bele identifika kriminozu sira no mós atu buka verdade materiál husi krime sira ne’ebé mak akontese”.
Sira ne’ebé partisipa iha formasaun refere mak Majistradu
Ministériu Públiku na’in-10 hamutuk ho ofisiais no investigadór sira hosi
Komisaun Anti Korrupsaun, Polísia Sientifiku no Investigasaun Kriminál (PSIK),
Polísia Nasionál Servisu Investigasaun Kriminál (PNSIK), Alfandega ho PNTL, (Media PJR).