Ermera – Segunda, loron-23, fulan-Setembru, tinan-2019, Adjuntu Prokuradór Jerál Repúblika Dr. Alfonso Lopez hetan konvite hosi ONG/FONGTIL hodi sai Oradór ba Kampaña Sensibilizasaun kona-ba Supervizaun Finansa Publika ne’ebé hala’o iha Munisípiu Ermera.
Iha kampaña sensibilizasaun ne’ebé organiza hosi sosiedade sivil ne’e, ba dahuluk nian APJR hato’o agradesimentu ba konvite ne’ebé mak ONG/FONGTILfó MP hodi bele esplika papél MP nian ba komunidade sira kona-ba oinsá mak bele partisipa iha justisa ne’ebé loloos, Ministériu Públiku (MP) hanesan orgaun ida ne’ebé iha papél importante tebtebes iha área Justisa no la hakru’uk ba sé de’it, nia so defende de’it ba legalidade demokrátiku no banati tuir Lei ne’ebé iha no reprezenta estadu hodi hasoru kriminozu sesé de’it.
APJR akresenta tan katak, auditoria sosiál nu’udar prosesu ida ne’ebé hodi apoia no serbisu hamutuk ho komunidade sira hodi monitoriza Governu nia serbisu, nune’e, bele garante katak dezenvolvimentu nasionál ne’e fó benefísiu ba ema hotu-hotu. Tanba ne’e, komunidade sira bele halo denunsia ba aktu ka hahalok ruma hosi ema hirak-ne’ebé mak la iha responsabilidade. Sensibilizasaun ne’e hanesan natureza ida ne’ebé informativu hodi hadi’a sosiedade ninia moris atu partisipa iha kontrusaun no dezenvolvimentu sosiál nasaun nian.
Iha fatin hanesan, Diretór ONG/ FONGTIL, Daniel Santos hateten katak, kampaña sensibilizasaun ida ne’e hodi fahe informasaun ba komunidade no lideransa komunitáriu sira kona-ba papél instituisaun sira Governu nian. Relasionadu ho programa ida ne’ebé FONGTIL organiza ne’e hanesan auditoria sosiál ida, tanba dalaruma ema rona liafuan auditoria ne’e ema hanoin sosiedade sivil sira halo auditoria ba Finansas, maibé la’os hanesan ne’e, atu labele
mosu espekulasaun oioin kona-ba informasaun sira ne’ebé iha komunidade nia leet, entaun, ita lori entidade estadu sira atu mai iha ne’e hodi hato’o informasaun ba komunidade sira kona-ba papél servisu entidade sira estadu nian.
Entidade hirak ne’ebé mak mai ne’e hanesan reprezentante sira hosi Parlamentu Nasionál (PN), Primeiru Ministériu (PM), Tribunál Kontas, Ministériu Públiku (MP), Komisaun Anti-Korrupsaun (KAK), Providoria Direitu Umanu no Justisa (PDHJ), sira ida-idak esplika kona-ba papél sira nian, nune’e atu ema hothotu bele entende didi’ak kona-ba saida loos mak auditoria sosiál ne’e no sira labele hakfodak ho buat ne’e.
Iha sorin seluk, Xefi-Suku Ponilala, Amaro Silveiro do Santos senti kontente bele partisipa iha semináriu ida-ne’e, tanba bele halibur informasaun kona-ba Papél instituisaun sira estadu nian ne’ebé mak hala’o servisu iha área oioin, liu-liu kona-ba Lei sira.
Nia hateten liután katak apresia ho sensibilizasaun ne’e, tanba iha Prokuradór hodi bele fó hanoin ituan ba sira kona-ba oinsa bele partisipa iha área Justisa nian, kuaze iha ligasaun ho tema ne’ebe ohin sira akompaña iha-ne’e, nia mós senti durante ne’e laiha informasaun ruma kona-ba asuntu auditoria sosiál nian, nune’e ho eventu ne’e sira bele hetan materia barak kona-ba oinsá bele halo auditoria ba orsamentu, inklui mós halo auditoria ba projetu ruma ne’ebé mak hala’o iha sira-nia suku laran. (Media PJR)