Aileu-Kuarta, loron-03, fulan-Abril, tinan-2024, Adjuntu Prokuradór Jerál Repúblika, (APJR), Dr. Jacinto Babo Soares, hato’o opiniaun jurídika ba projetu Lei númeru 3/VI (Ia) Exersísiu Direitu Petisaun, ne’ebé mak organiza husi Parlamentu Nasionál liuhusi Komisaun (A) ne’ebé mak trata asuntu lejislasaun no justisa.
Iha diskusaun espesializada ida ne’e APJR Dr. Jacinto Babo Soares hato’o mós opiniaun jurídika ba artigu lubuk ida hahú husi artigu ida to’o sanulu ne’ebé mak pasa ho proposta alterasaun lima (5) hahu husi artigu 1,2,3,7,10. Pasa, ba projetu Lei númeru 3/VI (Ia) Exersísiu Direitu Petisaun
Iha diskusaun ne’e Prezidente Komisaun A, deputadu Patrocinio Fernandes hateten Objetivu husi komisaun (A) nian konvida entidade relevante sira partisipa iha diskusaun projetu lei ida-ne’e atu bele rona sira nia opiniaun jurídika no konstrutivu ne’ebé di’ak hodi fó hanoin ba deputadu sira nune’e bele hetan Lei ida ne’ebé di’ak.
Projetu Lei ne’e artigu hamutuk 31 liuhusi reuniaun plenária iha loron-26, fulan-Marsu tinan-2024, Parlamentu Nasionál aprova Projetu Lei númeru 3/VI (Ia) Exersísiu Direitu Petisaun, ne’e iha faze jeneralidade deputadu sira Parlamentu nasionál fó votu afavór hamutuk 48, kontra no abstensaun zero, liuhusi Meza PN haruka hikas ba Komisaun A ne’ebé mak trata asuntu lejislasaun no justisa, hodi kontinua diskusaun espesialidade kada artigu.
Iha diskusaun espesialidade loron ba dahuluk nian ne’ebé realiza iha Otél Aisirimou-Aileu ne’e, deputadu, konvidadu no entidade sira hala’o diskusaun kada artigu ida-ida ne’ebé koalia konaba rekezitu formál sira, diskusaun ne’e sei kontinua to’o loron-05 fulan-Abril, tinan-2024. (Media PJR)