Dili, Segunda, loron-28, fulan-Marsu, tinan-2022, Adjunta Prokuradór-Jerál Repúblika Dra. Remizia de Fátima da Silva, hato’o relatóriu mensál ba Prezidente Repúblika Dr, Francisco Guterres Lú-olo, iha Palásiu Prezidente, Bairru-Pité.
Iha enkontru ne’e APJR subtitui PJR hodi informa ba PR kona-ba relatóriu mensál durante fulan- Janeiru to agora, no liliu kona-ba krime eleitorál nian, durante prosesu kampaña eleitorál to’o eleisaun prezidensiál ne’ebé realiza iha loron-19, fulan-Marsu, tinan-2022, krime eleitórál ne’ebé MP rejista hamutuk 7, Dili (6), Baucau (1) liu-liu kona-ba krime pertubasaun aktu eleitorál, úniku kazu ida mak kona-ba perturbasaun aktu eleitorál ne’ebé mak ho violensia no uza arma, no ida ne’e prosesu investigasaun la’o hela, nune’e mós propaganda aktu eleitorál hirak ne’e ninia prosesu la’o normál.
APJR salienta mós katak, Atualizasaun ba kazu pendete sira iha Ministériu Públiku iha nivél nasionál no kazu korrupsaun ne’ebé akontese Gabinete Sentrál Kombate Korrupsaun no Kriminalidadae Organizadu hala’o hela investigasaun. Kazu sira iha nivél territóriu nasionál dadaun ne’e kazu ne’ebé tama durante tinan-2022, hamutuk 2750 no agora redús ona ba 2369. No mós kona-ba kazu korupsaun nian prosesu pendente iha tinan ida ne’e hamutuk 108 no agora redús ba 105.
“Durante sorumutu ida ne’e Prezidente Repúblika Dr. Francisco Guterres Lú-Olo fó hanoin nafatin ba MP atu hala’o servisu tuir de’it lei ne’ebé iha ona, haree mós kona-ba kazu pendente hodi halo investigasaun tuir de’it lei haruka”. tenik APJR. (Media MP)