Lautem, loron-24, fulan-Juñu, tinan-2020, Adjuntu Prokuradór-Jerál Repúblika Dr. Alfonso Lopez, lansa primeira pedra ba konstrusaun edifísiu foun Prokuradoria Repúblika Distritu Lautem, ne’ebé lokaliza iha Aldeia 30 de Agusto, Suku, Fuiluru, Postu-Administrativu Lospalos, Munisípiu Lautem.
Iha biban ida ne’e APJR hato’o agradese wain, liuliu ba komunidade sira iha Munusípiu Lautem ne’ebé mak hola parte iha eventu ida ne’e. APJR mós akresenta tan katak hanesan Lautem oan, nia senti kontenti no agradese ba Ministériu Públiku tanba lori justisa hakbesik liu ba komunidade sira.
“Tuir planu Estratéjiku Dezenvolvimentu Nasionál ne’ebé defini ona hahú iha tinan-2011 to’o tinan-2030 iha pontu prinsipál balun mak hanesan, hakbesik justisa ba Povu, Tribunál, Ministério Públiku, Defensoria Públiku, sempre halo julgamentu movél iha Munisípiu hothotu, liliu ba kazu simples sira, maibe tanba orsamentu la to’o ho ida ne’e mak Ministériu Públiku hanoin katak atu hakbesik justisa ba povu entaun tenki harii tan edifísiu foun MP nian”, Tenik APJR.
Nune’e mós APJR husu ba komapañia Cambota.Lda tenki servisu ho kualidade no husu mós ba komunidade sira atu bele tau matan ba obra ne’e.
Iha sorin seluk Diretór Kompañia Cambota.Lda, Carlos M. P. Gonçalves dehan katak, sira sei esforsu makas atu bele ezekuta obra ne’e tuir tempu ne’ebé mak determina tiha ona. Montante orsamentu ne’ebé mak aloka ba konstrusaun ne’e hamutuk, $710,074.64, orsamentu refere hodi konstrui edifísiu ida no rezidénsia rua ba majistradu no ofisiál justisa sira.
Iha lansamentu primeira pedra ne’e partisipa mós husi, Administradór Munisípiu Lautem, Komandante PNTL Lautem, Diretora Terras Propriadades Lautem, Diretór Obras Públiku no Prokuradora Distritál Baucau. (Media PJR)