Dili-kinta, Loron-28, fulan-Setembru, tinan-2023, Adjunta Prokuradora Jerál Repúblika (APJR), Dra. Angelina Joanina Saldanha ho Adjuntu-PJR, Dr. Jacinto Babo Soares, hato’o sira nia prespetiva jurídika kona-ba Prozetu Lei No.1/VI, Konesaun indultu no Komutasaun ba Pena, iha Parlamentu Nasionál Komisaun A, ne’ebé trata asuntu Konstitusionál no Justisa.
Objetivu husi audiénsia refere, deputadu sira husi Komisaun A rona dereita opiniaun jurídiku husi setór judisiáriu sira liuliu Tribunál Rekurusu, Ministériu Públiku ho Defensoria Públika, nune’e, bele halo mudansa ba lei ne’e rasik atu labele mosu inpaktu ne’ebé ladi’ak iha inplementasaun ba future, liga ba realidade ne’ebé mak iha.
Iha Diskusaun ne’e APJR Dra. Angelina hato’o opiniaun jurídika ba Lei ida ne’e katak, Ministériu Públiku defende de’it legalidade no halo tuir de’it Lei, ami mai iha ne’e atu fó de’it pareser balun ba deputadu/a sira hodi bele haree didi’ak lei ne’e, tuir ami nia pareser iha artigu balun mak hanesan; Artigu 3,4,6,7,9,10, no tuir pareser ne’e katak artigu hirak ne’e presiza deputadu/a sira hare’e didi’ak antes lori ba plenaria. Nune’e mós Indultu signifika katak, ema ne’ebé mak hetan ona tranjítu julgadu iha tribunál, maibé tau mós nia responsabilidade sivíl, hodi sira bele responsabiliza ba hahalok ne’ebé sira halo. Presiza tau mós iha rejistu kriminál nian .
Audiénsia ne’e hala’o iha komisaun A ne’e, Prezide husi Prezidente Komisaun A, Deputadu, Patrocínio Fernandes, partisipa husi membru komisaun sira no hetan prezensa husi Ministériu justisa, Defensoria Públika, Diretór Jerál Prizaun no Sosiadade Sivíl. (Media PJR)