Díli – tersa, loron-06, fulan-Novembru, tinan-2019, Prokuradór Jerál Repúblika Dr. José da Costa Ximenes, aprezenta ezekusaun OJE 2019 no OJE MP nian ba iha tinan-2020 iha Komisaun A Parlamentu Nasionál.

Reuniaun ida-ne’e prezidi diretamente hosi  Prezidente  Komisaun  A Dra.Carmelita Caetano Moniz ne’ebé akompaña hosi Deputadu sira hosi kada bankada ida-idak hanesan CNRT, PLP, Fretilin, Kunto, UDT no PD.

Iha enkontru ne’e, PJR hahu aprezenta kona-ba rezultadu servisu tinan-2019 no relatoriu ezekusaun OJE tinan-2019 ne’ebé mak ezekuta ona, Iha tinan-2019 ne’e nian kategoria Saláriu no Vensimentu MP hetan atribusaun ho totál US$ 2,520.791, ezekuta ona 59%, restu US$ 1,023.268,36 espetativa bele ezekuta to’o 80 ou 90%, tanba sei prepara selu Majistradu balun ne’ebé mak sei ativu fali servisu iha tempu badak nia laran, Kona-ba bens no servisu atribui ho montante US$ 1,421.000 no ezekuta ona 87 %, espetativa sei ezekuta to’o 90%, tamba kumpre obrigasaun hein kompñia hatama sasan. kona-ba Kapital Menór  atribui US$ 337.000  agora dadaun  foin ezekuta ona 46%, espetativa bele ezekuta to’o 90%. Kapitál Dezenvolvimentu tinan-2019 atribui ho totál US$ 249.000,  halo konkursu  re-tenderizasaun  ba projetu rua mak hanesa Edifisiu Prokuradoria Distritál Lospalos, to agora seidauk hetan rezultadu tanba difikuldade avaliasaun ne’e hala’o husi Ministériu Obras Públika (MOP), Autoridade Dezenvolvimentu Nasionál (ADN), no MP rasik.

Projetu seluk mak servisu espesializadu ne’ebé hetan ona kompañia ho naran Bobolait iha fulan-Outubru tinan ne’e. PJR bele garante katak, Orsamentu ne’ebé mak Governu  atribui mai  MP 20% ami fiar kompañia refere bele informa iha tinan ne’e to’o loron-30 Novembru kompañia bele kumpri ona servisu balun.

PJR mós aprezenta orsamentu ne’ebé governu atribui ba tinan-2020 nian, iha kategoria haat, saláriu no vensimentu ho montante US$ 2,419.000,  Bens de Servisu ho montante US$ 1,781.000, Kapital Menór ho montante US$ 295.000, Kapital Dezenvolvimentu montante US$ 572.000. Iha kategoria balun MP husu halo transferensia liu-liu ba kategoria salariu no vensimentu ba bens no servisu ho razaun tinan oin sei haree liuliu ba manutensaun MP ninia instalasaun sira ne’ebé hari’i desde tinan-2008, 2009 no 2011,  to’o ohin loron seidauk iha manutensaun ba edifisiu sira hirak-ne’e. PJR husu ba deputadu sira diminui tiha orsamentu ne’ebé governu atribui ba saláriu no vensimentu , hodi bele muda fali bens no servisu, nune’e bele apoia manutesaun Edifisiu sira MP nian.

Aprezentasaun ezekusaun OJE tinan-2019 no planu asaun MP nian ba tinan-2020  aprezenta husi Prokuradór Jerál Repúblika, Dr. José da Costa Ximenes, Akompaña husi  Adjuntu Prokuradór Jerál Repúblika, Dr. Alfonso Lopez, Prokuradór Dr. Pascasio Alves, no servisu Administrasaun Jerál MP nian (Media PJR)