DILI – Tribunál Distritál Dili, iha loron-3, fulan-agostu, tinan-2016, desidi aplika pena prizaun tinan neen (6) ba arguidu Lolawan Iqbal, sidadaun hosi Aceh – Indonésia, tanba provadu katak nia na’ok mina tonelada 45 ne’ebé pertensia ba vítima Siu Pen Lay, iha Portu Tibar. Arguidu rua tan ne’ebé ajuda na’ok mina ne’e, Julio Varela ho Isaias dos Santos, hetan pena suspensa tinan tolu (3) fulan neen (6), tuir termu sira iha artigu 68.° n.° 1 Kódigu Penál nian.
Desizaun tribunál nian ne’e bazeia ba faktu sira ne’ebé provadu hosi akuzasaun Ministériu Públiku katak arguidu sira ne’e hanesan ko-autór materiál hosi krime furtu agravadu ida hosi artigu 251.°, 252.°, n.° 1 alinea d), e) no k) hosi Kódigu Penál. Tribunál mós kondena arguidu Lolawan Iqbal atu selu indenizasaun sivil ho valor $45.000 ba lezadu, Siu Pen Lay. Arguidu tolu seluk, ne’ebé empresta bomba no mangueira hodi supa mina, hetan absolvisaun hosi tribunál.
Kronolojia ba kazu ne’e mak iha loron-15, fulan-dezembru, tinan-2014, tuku 12:15, lezadu fó hatene ba polísia katak nia simu informasaun katak arguidu sira na’ok tiha mina gazóleu tonelada 50, ho valór osan $45.000, ne’ebé pretense ba nia no rai hela iha tanke ró Tongkang, iha Portu Tibar. Hafoin simu informasaun, polísia desloka kedas ba fatin akontesimentu no detein arguidu sira Lolawan Iqbal, ho suspeitu na’in tolu tan. Iha momentu ne’e kedas, suspeitu ida tan ho naran Edy ho sira seluk halai tiha ho ró, inklui lori hamutuk mina gazóleu ne’ebé sira na’ok, no polísia la konsege kaer.
Ministériu Públiku iha akuzasaun hatudu katak iha loron-14, fulan-dezembru, tinan-2014, oras entre tuku 8:00 kalan no tuku 9:00 kalan, arguidu Lolawan Iqbal, ne’ebé kontrola hela ró Tongkang, kordena hamutuk no hetan ajuda hosi Julio Varela ho Isaias dos Santos hodi hasai gazóleu hosi ró Tongkang no tau fali ba ró Sinar Jiwa, no hosi ró ida ne’e transfere fali ba suspeitu Edy nia ró ai ne’ebé nia lori hodi halai.
Julgamentu ba kazu hala’o hosi kolektivu juiz sira, preside hosi Dra. Jacinta da Costa, ho tan juiz nain rua mak Dra. Ana Paula Fonseca no Dr. Eusebio Xavier Victor. Ministériu Públiku reprezenta hosi Dr. Jacinto Babo Soares no arguidu sira hetan asisténsia legál hosi Defensoria Públika. (Media PJR)