Díli – Kuarta, loron-23, fulan-Outubru, tinan-2019, Delegasaun hosi Defensoria Públika Federal Brazil hala’o Vizita ba Prokuradoria Jerál Repúblika TL, iha Edifísiu Colmera.
Objetivu hosi vizita delegasaun Defensoria Públika Federal Brazil nian mak atu hala’o reuniaun ho autoridade timoroan sira liuliu ho Ministériu Públiku hodi hametin liután lasu kooperasaun entre instituisaun sira ne’e, nune’e bele fortalese setór justisa Timór-Leste nian no kria oportunidade hodi bele hahú projetu foun sira kooperasaun ninian.
Bainhira simu bainaka sira ne’e, ba dahuluk nian Adjuntu Prokuradór Jerál Repúblika Dr. Alfonso Lopez hato’o agradesimentu ba delegasaun Defensoria Públika Federal Brazil nian, no mós hateten katak, Timór-Leste nu’udar nasaun ne’ebé joven, ne’ebé mak hafoin halo tiha tinan-17 restaurasaun ninia independénsia. Ne’e signifika katak ita sei iha hela prosesu edifikasaun no konsolidasaun ba ita-nia ordenamentu jurídiku no ita-nia instituisaun sira. Sirkunstánsia istóriku ida-ne’e permite mai ita, ho vantajen atu koñese solusaun hirak ne’ebé esperimenta ona iha País sira seluk no bele mós atu evita hodi repete hikasfali erru sira, espesifikamente kona-ba sistema judisiál ka, espesifikamente kona-ba Ministériu Públiku, ita iha hanoin atu hakarak hatene kona-ba esperiénsia komparadu sira, ne’ebé bele serve nu’udar referénsia ba ita.
Iha biban ne’e, APJR mós hato’o kona-ba dezenvolvimentu kapitál umanu, ne’ebé nu’udar dezafiu ida ne’ebé fundamentál tebes, tanba ne’e mak formasaun ba majistradu sira nu’udar eixu prioritáriu ita-nia asaun nian. No, iha ámbitu ida-ne’e, páis sira CPLP nian naturalmente sai nu’udar ita-nia parseiru fundamentál atu ita-nia kooperasaun ho Brazil sai efetivu liután.
Iha fatin hanesan Sub-Defensór Publiku-Jerál Brazil Dr. Jair Soares Júnior, hato’o agradesimentu ba Ministériu Públiku Timor-Leste liuhosi ambitu kooperasaun ida-ne’e, nia hateten mós katak Ministériu Públiku ho Defensoria Públiku hanesan instituisaun ida ne’ebé importante tebes hodi defende kontituisaun RDTL, prinsipalmente, ba Justisa ida loos no forte ba nasaun TL. kooperasaun ida-ne’e hodi konstrui no dezenvolve instituisaun ida ne’ebé ho nia funsaun esensiál ba área Juridisaun nian.
Iha Vizita ba Edifísiu Prokuradoria Jerál Repúblika TL, Dr. Câncio Xavier hosi Defensoria Públika TL nian mak akompaña delegasaun hosi Defensoria Públika Federál Brazil ne’ebé kompostu hosi Sub-Defensór Publiku-Jerál Brazil Dr. Jair Soares Júnior, Defensores Públiku Federál Dra. Tatiana Siqueira Lemos, Dr. Pedro Paulo Chiavini no Dr. Rodrigo Esteves Rezende inklui mós Koordenadora Asistensia Jurídika Internasionál Sra. Tatyana Moreira Garcia. (Media PJR)