Dili
– iha Sesta, loron-12, fulan-Jullu, tinan-2019, Prokuradór Jerál Repúblika
(PJR) Dr. José da Costa Ximenes, hetan vizita kortezia husi delegasaun Setór
Justisa Repúblika Federál Brazil nian hodi hametin kooperasaun iha setór
justisa, iha Edifisiu Kolmera, Dili.
Iha Vizita kortezia ida ne’e Sekretáriu-Jerál Konsellu
Nasionál Justisa, Carlos Viera Von Adamek, hateten katak, “iha vizita ida-ne’e
ami hakarak hato’o kona-ba proposta kolaborasaun ne’ebé mak ami hala’o tiha ona
ho Tribunál Rekursus, liuhusi kooperasaun Ajensia Brazil nian, ami aprezenta
mós proposta kooperasaun ba Tribunál kona-ba
área prosesu Jestaun Administrativu no Jestaun Prosesuál nian liuhusi prosesu
elektróniku nian hanesan iha nasaun Brazil, ami fiar katak, husi sasán elektróniku
ne’e bele dezenvolve no adapta realidade Timor nian no bele lori kontribuisaun
ba nasaun Timor- Leste.
Sekretáriu-Jerál ne’e hateten liután katak, liuhusi sistema
sira ne’e, Timoroan bele aproveita utiliza
iha instituisaun sira Justisa nian hanesan; Prokuradoria Jerál Repúblika,
Defensoria Públiku, inklui mós Advogado sira. Ida-ne’e hanesan primeiru parseiru
ne’ebé koloka ona hanesan programa pilotu ida ba Tribunál Rekursu, ho nune’e
iha futuru bele lori to’o iha Tribunal Distritál sira no iha mós programa
kapasitasaun ba tékniku sira. Iha parte Administrasaun interna nian, ami
oferese rekursus ho sistema ne’ebé hanesan ho Brazil nian hodi hadi’a servisu pesoál
sira nian iha área Administrasaun no Partimoniu. Ida-ne’e hanesan programa ba primeira
etapa ne’ebé hala’o ho Tribunál sira hodi bele hadi’a liután sistema servisu
sira iha futuru.
Iha fatin hanesan, Prokurador Jerál Repúblika Dr. José da
Costa Ximenes, informa mós ba Sekretáriu-Jerál Konsellu Nasionál Justisa, ho ninia
ekipa sira kona-ba funsionamentu gabinete 2 (rua) ne’ebé estabelese ona iha
Prokuradoria Jerál Repúblika nia okos mak hanesan; Gabinete Kontensiozu Estadu
no Gabinete Sentrál Servisu Kombate Korrupsaun no Kriminalidade Organizada (GSKKKO).
Gabinete ne’e ho ninia majistradu na’in-4 hodi haree ba krime sira ne’ebé
akontese iha ezersísiu funsaun públika nian, nune’e mós ho kriminalidade
organizadu sira hanesan trafíku umanu, droga, brankeamentu kapitáis no
Departamentu Kuradoria Menór no Família. Departamentu ne’e funsiona iha Prokuradoria
Repúblika Distritál sira ho nia funsaun haree liu ba menor-idade no violénsia
doméstika ne’ebé afeta ba família no labarik sira.
Iha vizita ne’e mós Sekretáriu-Jerál ,Carlos Viera Von ho
nia ekipa konvida PJR-TL atu partisipa semináriu ida iha Brazil, ne’ebé sei
hala’o iha fulan-Agustu, tinan-2019, ne’ebé organiza husi Prokuradória Jerál Brazil
nian, atu bele koñese sistema dezenvolvimentu servisu sira iha Brazil nian.
Delegasaun hirak-ne’ebé mak hala’o vizita refere ne’e
kompostu husi; Dezembargadór Sekretáriu-Jerál Konsellu Nasionál Justisa, Carlos
Viera Von Adamek. Juis Traballu, Bráulio Gabriel Gusmão. Juis Tribunál Justisa,
Rondónia ho Sandra Silvestra. Xefe Gabinete Sekretariu Jerál CNJ, Sr. Rodrigo
Rocha. Tekniku kooperasaun TL, Sr.Paulo Lima. Analiza Projetu husi Agensia
kooperasaun Brazileira Sr. Rosana Tamazi. (Media
PJR)