Prokuradór-Jerál Repúblika, Dr. José da Costa Ximenes
ho komitiva dezloka ba Boenos Aires – Argentina iha loron-15 to’o loron-19,
fulan-Setembru, tinan-2019 hodi partisipa iha Konferensia Anuál ba dala-24 no
Enkontru Jerál husi Organizasaun IAP – International
Asosiation of Prosecutor.
Partisipasaun
PGR Timor-Leste iha eventu refere hanesan membru efetivu ida ne’ebé enklina-an
ona ba organizasaun internasionál refere hahú husi tinan-2011 to’o ohin loron.
Konferénsia anuál no enkontru jerál ne’e ho tema: “Kooperasaun Internasionál ho
Sistema Jurídiku ne’ebé diferente”. Iha enkontru ne’e esplora ideia
hanesan oinsa mak bele halo kooperasaun internasionál ne’ebé di’ak maske liu
husi sistema jurídiku ne’ebé diferente hodi atua difikuldade no solusiona
problema hirak-ne’ebé akontese. Objetivu
husi enkontru ne’e, foka liu ba hasa’e koñesimentu, ba efikásia no efisiénsia
husi kolaborasaun internasionál nian.
Durante konferénsia esplora mós sub
tema 4 hanesan Sistema diferente –
Dezafiu ne’ebé hanesan; Koleta no kompartilla Evidensia; Papél Prokuradór nian ba investigasaun
transfronteirisas; no impaktu alternativa Ministériu Públiku nian ba
kooperasaun Internasionál.
Husi sub tema 4 refere iha leten konsidera katak, país ida-idak dezenvolve
nia sistema jurídiku própriu ho baze husi sira nia historia rasik, kultura,
tradisaun no tuir sira nia lei inan ka konstituisaun rasik. No iha mundu modernu oras ne’e globalizadu,
arkitetura jurídika nasionál no internasionál presiza adapta no evolui hodi
atende no kombate tipolojia no ameasa krime oioin ne’ebé konstante mudansa ba bei-beik. Iha momentu ne’e instrumentu sira, regra no
prosedimentu legál sira insternasionál no nasionál sai papél fundamentál iha
konstrusaun prosesu no prosesu kriminál husi promotór sira. Nune’e papél no responsabilidade promotór iha
investigasaun kompleksa transfronterizas no maneira hanesan promotór interajen
ho ator sira seluk ba sistema justisa kriminál nasionál no internasionál iha impaktu profundu liu ba forma no progresu
kazu ida.
Nune’e kada sesaun sira ne’e konsidera bareira legál, estrutura no
organizasaun altu nível ba kooperasaun nian tenke foti aas nafatin. Presiza esplora no kontinua hadi’a sistema
justisa nian ida-idak liuhusi sistema
reforma ka armoniza nune’e bele mellora kooperasaun internasionál. (Resp./GPJR)