Dili- Prokuradór Repúblika, Dr. Jose Elo, iha loron-17, fulan-Novembru, tinan-2022, hetan delegasaun hosi Prokuradór Jerál Repúblika hodi partilla papél Ministériu Públiku nian ba forsa Naval F-FDTl iha heran durante loron baluk

Iha okaziaun ne’e, Dr.Jose Elo hatete katak, Ministériu Públiku nudar orgaun /instituisaun ida importante ne’ebé konsagra iha Konstituisaun RDTL iha  artigu 132o, hatudu momos katak MP laos orgaun administrasaun públika, laos orgaun polítika, laos orgaun exekutivu/legislativu, MP nudar orgaun autonoma/independente ne’ebé la subordina/tabele ba orgaun seluk hosi poder Estadu nian tamba ne’e, MP liu hosi Majistradu MP/Prokuradór sira tenke atua/servisu tuir lei ho forma objetiva no insenta/livre, kumpri deit ba ordem no direktiva sira hosi superiór hierarkiku, maibé ordem ka diretiva ne’e tenki tuir lei.

 Nia akresenta tan katak, MP iha fase investigasaun Kriminál, tuir lei haruka, laos halo servisu mesak, maibé sei hetan tulun makas hosi funsionáriu judisiál no Polísia Investigasaun Kriminál (PNSIK, SIC, PSIK no CAC) ba efeitu rekolla prova, tamba ne atu kombate hasoru krime komun no krime sira transnasionál, laos ho lei deit, maibé presiza ema hotu-hotu/sidadaun sira nia kontribuisaun, iha hanoin di’ak ba ita nia rain rasik no hadook-an hosi hahalok krime sira referidu.

Nune’e mós Dr. Elo esplika mós konaba akuzasaun, kuandu prosesu ida termina ho akuzasaun, notifika interveniente sira no sei haruka ba Tribunál atu halo julgamentu, ho rezultadu kondena arguidu kuandu prova sira forte, ou bele halo absolvisaun arguidu kuandu laiha prova ne’ebá suficiente atu halo kondenasaun, aleinde ne’e Prokuradór Repúblika ne’e esplika mos konaba lalaok investigasaun, Detensaun,  Inkéritu/investigasaun no seluk tan.

Iha fatin hanesan,  segundiu Tanente Simão C. dos santos Soares mós hato’o agradese ba Ministériu Públiku liu hosi Prokuradór Dr. Jose Elo, “ ha’u nia agradese ba MP tanba liu hosi prokuradór bele partilla ona mai ami konaba papel importante hosi MP nian, nune’e ami agradese ba PJR tanba bele kumpri ami nia konvite hodi mai partilla hela informasuan balun konba ba Mp nian mai ami, tanba liu hosi Dotor ami hatenen uitoan konaba lalaok sira oinsa halo atuasaun ba krime ruma”. (Media PJR).