Oecusse-loron-20, fulan-Novembru, tinan-2019, Prokuradór-Jerál Repúblika (PJR), Dr. José da Costa Ximenes fó pose ba Dr. Matias Soares hodi asumi fali kna’ar nu’udar Prokuradór Distritál Oecusse (PDO) durante tinan tolu hodi troka fali Dr. Mateus Nessi ne’ebé antes ne’e okupa hela kargu nu’udar Prokuradór Distritál Oecusse, serémonia tomada de pose ne’e realiza iha salaun Alfandega Rejiaun Administrativu Espesiál Oecusse-Ambeno (RAEOA).
Iha ninia diskursu PJR hato’o agradesimentu ba partisipante sira tanba bele fó ona sira-nia tempu hodi bele partisipa iha serémonia tomada de pose ne’e “agradese ba konvidadu sira, tanba simu ona ami-nia konvite hodi husik hela imi-nia tempu mai partisipa iha ami-nia serémonia ida-ne’e, permite ha’u hodi lori naran Prokuradoria Jerál Repúblika nian no ha’u nia naran hato’o ami-nia saudasaun espesiál ba Prezidente RAEOA ne’ebé foin simu posse iha semana kotuk, fiar katak ho kargu ne’ebé foun sei lori susesu ba povu RAEOA iha futuru.
Relasionadu ho tomada de pose PDO nian ne’e, PJR hatete katak “iha loron-30, fulan-Outubru, tinan-2019, Konsellu Superiór Ministériu Públiku (KSMP) desidi ona Dr. Matias Soares sai nu’udar Prokuradór Distritál Oecusse, desizaun ida-ne’e bazeia ba esperiénsia profesionál ne’ebé nia iha, antes asumi kargu nu’udar PDO, ulukliu nia asumi ona kargu nu’udar Prokuradór Distrtál Suai durante tinan-3.
PJR akresenta tan katak “konfiansa ida-ne’e mai hosi KSMP, Prokuradór-Jerál Repúblika hanesan prezidente KSMP maibé ninia votu ida de’it, KSMP ne’e iha ema na’in-lima ne’ebé mai hosi reprezenta Prokuradór sira, reprezenta Governu no reprezenta Parlamentu Nasionál, inklui mós reprezenta Prezidente Repúblika, tanba ne’e KSMP husu ita-nia responsabilidade ba materiais ne’ebé MP iha, rekursu umanu no kooperasaun Institusionál ho autoridade sira iha RAEOA, hodi haree ba krimi organizadu sira, nune’e mós kooperasaun entre instituisaun judisiáriu sira ho ONG sira, tanba ita mesak ladún iha forsa hodi atinji buat ne’ebé ita hakarak, tanba kargu ne’e la’ós ezizi de’it ita-nia responsabilidade, maibé ezizi mós ita-nia lideransa no talentu.
Iha oportunidade ida-ne’e, ha’u hakarak presta mós ha’u-nia rekonesimentu ba Dr. Mateus Nessi nu’udar Prokuradór Distritál Oecusse Sesante, kuaze tinan haat hala’o kna’ar nu’udar Prokuradór Distritál Oecusse, uluk Dr. Mateus Nessi ho Prokuradór Repúblika ida, maibé ikus mai nia mesak iha PDO, durante nia mesak, nia sempre mantein númeru prosesu hamutuk atus haat iha nivél nasionál tinan-tinan nia sempre termina prosesu liuhosi atus haat tanba ne’e ha’u nunka arepende bainhira koloka nia iha Oecusse.
Bainhira nia simu posse, nia desidi atu hela iha uma estadu, maske nia uma privadu iha Oecusse, ha’u husu nu’usa mak ita desidi hela iha uma estadu tanba ita-nia uma rasik iha, sim señór Prokuradór-Jerál Repúblika, ha’u mak desidi hela iha uma Estadu atu nune’e bele impoin ha’u nia imparsialidade no ha’u lakohi atu familia mai intervein iha ha’u-nia servisu, tanba ne’e ha’u desidi atu hela iha uma estadu, ida ne’e estrañu tebes, haktuir PJR liuhosi ninia diskursu.
Iha fatin hanesan, emposadu, Dr. Matias Soares hanesan Prokuradór Distritál foun hateten katak “Hanesan ajente MP, ne’ebé reprezenta Estadu, ezerse asaun penál, asegura defeza menór, auzente no inkapás sira, defende legalidade demokrátika no promove kumprimentu lei, ha’u sei ba ezerse ha’u-nia knaar ho integridade, lealdade, dedikasaun, profisionalizmu no rejista nafatin tuir kritériu sira legalidade, objetividade, izensaun no obediénsia ba diretiva no orden sira husi superiór ierárkiku sira, haktuir lei, hodi buka servi di’ak nafatin ba Komunidade Oecusse – Ambena ne’ebé buka justisa.
Emposadu ne’e mós promete katak sei nafatin halo kooperasaun servisu ho entidade hothotu, “no atu defende interese sira Estadu nian, iha kazu sira ne’ebé lezadu maka Estadu no interese sidadaun sira nian, jeralmente iha promosaun kumprimentu lei, presiza kolaborasaun ho entidade hotu-hotu iha área promosaun asaun penál, ho destake ba polísia kriminál no Unidade PNTL hotu-hotu kolokadu iha Oecusse, hanesan Unidade Patrullamentu Fronteira, Unidade Patrullamentu Marítima, Servisu Imigrasaun, Organizasaun Naun-Governamentál sira ne’ebé fó asisténsia legál ba vítima no lezadu sira no mós servisu sira Saúde no naturalmente Tribunál Oecusse nian”.
Nia tenik tan katak “ha’u gosta mós atu agradese no presta omenajen ba Dr. Mateus Nessi, ha’u-nia antesesór iha kargu, husi servisu ne’ebé presta ba populasaun Oecusse durante ninia mandatu nu’udar Prokuradór Repúblika Distritál, dezeja ba nia felisidade iha ninia vida pesoál no profisionál”.
Atu asegura funsionamentu servisu loron-loron administrasaun no prosesuál iha Prokuradoria Distritál Oecusse, ita
konta nafatin ho apoiu morál no materiál husi Sua Exelénsia Prokuradór Jerál Repúblika no Prokuradór Jerál Adjuntu.
Nu’udar Prokuradór Repúblika Distritál, há’u sei la servisu mesak, maibé há’u hein konta nafatin ho kolaborasaun leal husi Prokuradór, Sekretária, Ofisiál Justisa no funsionáriu sira kolokadu iha distritu judisiál ida-ne’e. Karik nune’e ita bele alkansa objetivu servisu Ministériu Públiku nian iha PDO.
Iha biban ne’e mós reprezentante Prezidente RAEOA, Agustino Caet lori Prezidente RAEOA nia naran hodi hato’o lia-menon katak “espera katak ba futuru ita sei servisu hamutuk hodi dezenvolve di’ak liután RAEOA, tanba ne’e kolaborasaun entre MP ho Prezidente RAEOA importante tebes atu bele redus ita-nia problema sira ne’ebé akontese iha RAEOA, ikusliu lori Prezidente RAEOA nia naran ha’u hato’o parabens ba Dr. Matias soares. (Media PJR).