Dili, loron-25, fulan-Setembru, tinan-2023, Adjuntu Prokuradór Jerál Repúblika (APJR), Dr. Nelson de Carvalho, sai oradór ba semináriu nasionál ida hodi esplika konaba “Levantamentu Prosesu Litijiozu ba Tribunál, hodi Reprezenta Estadu Kontra Desizaun Administrativu Komisaun Terras no Propriedade Nian”, iha semináriu Nasionál ne’ebé realiza husi Ministériu Justisa no UNDP hamutuk ho komisaun Terras Propriedade ho tema prinsipál “Promove rezolusaun ba disputa rai liu husi komisaun Terras propriedade hodi hametin seitór Justisa iha Timor Leste”. Hodi konsolida no hametin seitór Justisa hodi fó esperansa ba povu konaba asesu ba Justisa iha Timor-Leste.
Iha Dr. Nelson nia esplikasaun hatete, “ Ministériu Públiku (MP) la iha intensaun atu halo levantamentu, inventáriu ka listajen hosi prosesu sira ne’ebé ninia objetu mak desizaun administrativu hosi komisaun Terras no Propriedade. Nune’e mós bainhira buka informasaun sira konaba intervesaun ida ne’e MP simu informasaun konaba prosesu rua. Prosesu ida konaba alargamentu Aeroportu Internasionál Dili nian, Prezidente Nicolau Lobato, prosesu ne’e MP instaura ona no iha faze situasaun ba réu. No ida seluk mak Ainaro nian, ne’ebé seidauk hato’o kontestasaun, tanba prazu legál remata tiha ona mak majistradu foin simu.
Dr. Nelson afirma tan katak, problema rai kontinua sai problema iha país bara-barak iha mundu, mezmu husi país sira ne’ebé ho sistema polítiku estabilizadu. Nia akresenta liu tan katak, iha lejizlasaun oioin ne’ebé prodúz ona, intervensaun hosi diresaun terra no priopriedade ka Komisaun Terras no Propriedade nian sai nudár entidade ne’ebé ho kompoténsia exelente hodi rezolve kestaun sira ne’e.
Nia reafirma tan katak, iha aspetu sira ne’ebé hakarak partilla mak, ita sei esforsu atu mellora artikulasaun entre ita-nia servisu sira-MP ho Ministériu sira seluk ba Justisa nia di’ak no ba konsolidasaun ita-nia Estadu Direitu Demokrátiku.
Semináriu ne’ebé realiza iha Suai Room Timor Plaza ne’e hetan partisipasaun hosi autoridade Lokál balun, hanesan Xefe Suku, ONG no sosiedade sivíl sira, (Média MP).