Dili-Loron-28, fulan-Abril, tinan-2023, Dra. Bemvinda do Rasário, reprezenta Prokuradór Jerál Repúblika hodi partisipa no hato’o intervensaun iha ámbitu aniversáriu Judicial System Monitoring Program (JSMP) ba dala 22, iha salaun Delta Nova, reprezentaten PJR nian ne’e husu ba JSMP nafatin kritíka no fó suzestaun ba seitór justisa nune’e bele hadia di’ak liután sistema justisa sira iha Timor-Leste.
Iha intervensaun Dra. Bemvinda nian hatete katak “durante tinan-22, JSMP kontribui makas ba dezenvolvimentu iha seitór jusitsa, nune’e merese hetan apresiasaun hosi ita hotu, tamba komitmentu no konsistente iha servisu ne’ebé di’ak tebes ho objetivu atu hadia sistema justisa nia funsionamentu tuir kuadru legál ne’ebé iha”.
Nia akresenta tan katak “Ministériu Públiku (MP) iha esperiénsia parseiru ho JSMP ne’ebé dura ho tinan barak to’o ohin loron, ho parseria ne’ebé iha MP ho JSMP konsentra iha asuntu sira hanesan, sensibilizasaun ba krime violénsia doméstika, sosializasaun ba lejislasaun sira, semináriu, workshop no atividade sira relevánsia ho atividade ba protesaun krime sira ho natureza violénsia doméstika, krime violénsia bazea ba jenéreu, ida ne’e nudár pilár importante ida ba prevene no kombate krime ho natureja hanesan ne’e”.
MP mós rekoñse JSMP nia peskiza no monitorizasaun azuda tebes Prokuradór sira atu hadia di’ak liu tan kualidade servisu tuir regra aplikavél, atu bele fó garantia ba komunidade ne’ebé buka justisa.
Prokuradora ne’e subliña tan katak “MP nakloke ba sujestaun no rekomendasaun sira ne’ebé nesesáriu hodi mellora servisu sira iha seitór justisa, tamba Prokuradór sira servisu tuir regra estabelesida, peskizadór sira mak servisu tuir matadalan ka regra ne’ebé mak iha, ho objetivu ida deit atu fó justisa ne’ebé adekuadu ba komunidade sira”.
Aleinde ne’e MP konsidra JSMP hanesan organizsaaun sosiedade sivíl ida ne’ebé iha kredibilidade, tau matan ba sistema justisa atraves hosi sira nia relatóriu no rekomendasaun sira, tamba ne’e hanesan reprezentante PJR nian husu ba JSMP atu mantein nafatin funsaun kritíka ba seitór justisa nian nomeadamente ba kualidade akuzasaun no desizaun sira hosi triubuná, ho nune’e MP apresia ba JSMP tamba hosi nia kontribusaun politíka lejislativa hodi lori progeresu boot tebes ba sistema justisa iha ita-nia nasaun.
Aniversáiru ohin kontinua hatudu JSMP nia maturidade, nudár organizasaun sosiedade sivíl ne’ebé tau matan ba seitór justisa hodi deskobre buat ruma hodi relata iha nia relatóriu importante sira hodi kontribui ba melloramentu sistema justisa iha Timor-Leste. Nafatin enkoraja ba JSMP atu kontinua servisu ho kritíka no sujestaun, ikus liu parabens ba JSMP, (Media PJR).