Díli-iha loron-03, fulan-Setembru, tinan-2019, Prokuradór-Jerál Repúblika, Dr. José da Costa Ximenes ba iha  Palasiu Prezidente, Bairru Pite, hodi informa ba Prezidente Repúblika (PR), Dr. Francisco Guterres Lú-Olo kona-ba atividade ne’ebé Ministériu Públiku (MP) hala’o iha fulan-Agustu nia laran.

Iha enkontru ida-ne’e,  Prokuradór-Jerál Repúblika Dr. José da Costa Ximenes hato’o katak durante férias judisiáriu, MP kontinua hala’o ninia atividade lubuk ida entre hirak ne’e mak hanesan; majistradu no ofisiál justisa sira nafatin garante hala’o servisu hanesan halo primeiru interogatóriu judisiáriu no julgamentu sumáriu, no mós aproveita férias judisiáriu ne’e, MP ho ninia parseiru dezenvolvimentu sira halo atividade balun hanesan; iha fulan-Agustu nia-laran, Adjuntu Prokuradór-Jerál Repúblika partisipa konferénsia Internasionál ida iha Brazil kona-ba meiu- ambiente no tráfiku droga, no partisipa mós iha grupu Ásia Pasífiku kona-ba brankeamentu kapitais no kombate terorrizmu iha Canberra, Australia.

PJR mós hato’o katak ba dala uluk MP hamutuk ho Estadu Unidus Amerika, dezigna majistradu na’in-tolu, hamutuk ho majistradu judisiál sira na’in-7, totál hamutuk na’in-10, ba halo estudu ida iha Estadus Unidus Amerika besik semana rua, komesa loron-15 to’o 26 Agustu, ami-nia majistradu ida mós hamutuk nafatin ho Estadus Unidus Amerika ba partisipa formasaun ida iha fim-de-jullu durante semana rua iha Bangkok, Ailea, kona-ba trafiku umanu, nune’e, semana oin mai iha loron-9 to’o loron-13, fulan-setembru, majistradu na’in-rua sei partisipa tan formasaun iha Bangkok, Ailea, kona-ba korrupsaun no rekuperasaun ativus, ida seluk sei tuir formasaun kona-ba korrupsaun iha setór Públiku nian, ida-ne’e atu hatete katak, maske iha hela férias judisáriu maibé ita kontinua kapasita, eleva nafatin kualidade, kapasidade ita-nia kuadru majistradu sira hodi halo servisu di’ak liután.  

Iha fatin hanesan, PJR hato’o mós katak Prokuradór-Jerál Repúblika asina ona memorandu entendimentu ida ho KFP. Ba ninia implementasaun ida-ne’e, MP halo servisu hamutuk iha nivél formasaun konjunta ne’ebé envolve mós sira ne’ebé hosi KFP maibé ho pedidu Prezidente KFP nian katak ohin to’o bainrua, ami desidi ami-nia majistradu ida no tékniku ida fó deit formasaun ba ita-nia investigadór sira hosi KFP nian, matéria ne’e ita dezenvolve hanesan formasaun iha ambitu kriminál no dixiplinár liu-liu iha pontu-de-vista legais administrativu nian.

Atividade seluk mak mai hosi KSMP ne’ebé horseik delibera pontus importante balun hanesan nomeia tiha ona ema na’in-6 ba sekretáriu sira iha servisu sentrais no servisu espesialidade inklui mós iha Distritál sira. Iha loron-06, fulan-setembru, sira na’in -7 sei simu pose, na’in-6 permanente no ida interinu ba kargu sekretária iha servisu espesializadu no Prokuradoria Repúblika Distritál sira, ida ba Sekretáriu Superiór ba KSMP, ida Sekretária ba Servisu Inspeksaun, ida sai Sekretária ba Gabinete Sentrál Kombate Korrupsaun no Kriminalidade Organiadu (GSKKKO) no mós Servisu Kontensiozu Estadu no seluk ba Sekretáriu Prokuradoria Dsitritál sira, tanba uluk nomeasaun interina de’it, depois tuir prosesu formasaun no hela ida de’it mak sei interina no sira seluk permanente hotu ona. (Media/PJR)