Funsionáriu
Públiku nu’udar servidór povu no estadu ida ne’e iha obrigasaun hodi garante
funsionamentu servisu ne’ebé di’ak iha idaidak ninia ministériu ka instituisaun
sira estadu nian. Haree papél importante ne’e, nune’e, Diresaun Nasionál PJR nian fó formasaun ba
funsionáriu Prokuradória Distritál Díli (PDD) sira kona-ba étika dixiplinár ,
funsionamentu IT, finansas no lojístika. Formasaun ne’e realiza iha Sesta,
loron-09, fulan-Fevereiru, tinan-2019. Partisipante ba formasaun ne’e hamutuk na’in-33.
Prokuradór Distritál Dilí, Dr. Jacinto Babo mak
ofisialmente loke formasaun ne’e, no iha biban ne’e nia hateten katak formasaun
ne’e oportunidade ida di’ak tebes, hodi nune’e funsionáriu PDD bele haklean
sira-nia koñesimentu kona-ba servisu
sira funsaun públika nian. No nia mós dehan tan katak “ha’u hatene imi lubuk
ida iha ne’e barak mak mai hosi direitu no balun mai hosi Sentru Formasaun
Judisiáriu, nune’e, ita presiza nafatin fó
formasaun komplementár hodi fanu nafatin ita hodi bele ezerse ita-nia funsaun
tuir lei haruka, ida-ne’e oportunidade di’ak ida hodi esplika ba ita-boot sira
kona-ba lei sira ne’ebé ligadu ho rejime funsaun públika nian”.
Aprezentasaun ba dahuluk nian hato’o hosi formadora ne’ebé mós kaer kargu nu’udar Xefe-Departamentu Étika Dixiplinár Sra. Barbara S. Baptista, ne’ebé esplika ba funsionáriu sira kona-ba Estatutu Funsaun Públiku nian, Lei no. 8/2004, 16 Juñu.
Formadora ne’e hatutan tan katak “ Ami mai iha ne’e atu
fahe informasaun ba funsionáriu PDD sira kona-ba dever jerál funsionáriu públiku
no ajente administrasaun publiku nian, no ninia objetivu importante liu iha
ne’e mak atu fó hanoin filafali ba funsionáriu sira kona-ba Estatutu Funsaun Públiku
nian.
Tuir kedas ho aprezentasaun hosi Xefe-Departamentu IT, Sra.
Juvita Chioda ne’ebé esplika kona-ba
funsionamentu servisu diresaun IT nian ne’ebé ligadu ho papél importante IT nian hodi hala’o atendimentu,
operasaun, asisténsia téknika hala’o lina kordenasaun bainhira akontese
problema ka fallansu tékniku ruma, entaun, sei haruka tékniku IT balun ba fatin
refere hodi bele rezolve problema ne’e.
Iha biban ne’e Sra. Juvita hateten tan katak responsabilidade
prinsipál ba ekipamentu sira informatika nian ne’ebé mak instala iha Data
Center PDD no rutina halo monitorizasaun ba UPS Server hodi garante enerjia
eletrisidade la’o normál nune’e bele fornese enerjia eletrisidade ba server no
ekipamentu sira ne’ebé mak instala ona iha rack server, aleinde ne’e halo
mós monitorizasaun ba sistema database “Casc Management system” (CMS) hodi
garante sistema ne’e la’o ho normál, kontrola proxy server squid hodi garante uzuáriu sira bele
utiliza liña lokál, liña internet inklui liña sistema sira seluk.
Aprezentasaun tuirmai hato’o hosi Xefe-Departementu
Finansa anterior atuál Diretór Rekursu Umanu, Sr. Noemio da Silva, ne’ebé
esplika kona-ba pagamentu saláriu, liu-liu kona-ba utilizasaun orsamentu sira iha
petty cash, hodi halo formasaun no orsamentu ba viajen lokál nian ne’ebé mak
sentraliza iha diresaun nasionál PJR nian, inklui mós prosedimentu balun kona-ba
alokasaun orsamentu sira.
Aprezentasaun dahikus nian hato’o hosi Xefe-Departamentu
Lojístika anterior atuál Diretora Finansa no Orsamentu, Sra. Ana Bela Lesu,
esplika mós kona-ba prosesu servisu lojístika nian no nia mós hateten bainhira
atu uza sasan patrimóniu estadu ne’ebé ejisti iha Ministériu Públiku (MP) tenki
prienxe uluk formuláriu rekizasaun hodi hetan autorizasaun no koñesimentu hosi
Departamentu Lojístika. (Media PJR)