Dili-Sesta, loron-04, fulan-Fevereiru, tinan-2022, Prokuradór Jerál Repúblika Dr. Alfonso Lopez simu Embaixadór Repúblika Indonésia, Okto Dorinus Manik ho ninia ekipa ne’ebé mak hala’o vizita kortezia ba iha edifisiu PJR Colmera.
Objetivu husi vizita Embaixadór Indonésia nian ne’e mak hodi hala’o reuniaun ho Prokuradór Jerál Repúblika, no fahe informasaun ba malu kona-ba sistema jurídiku ne’ebé eziste iha país rua ne’e, aleinde ne’e ko’alia mós kona-ba posibilidade ba kooperasaun hamutuk iha área judisiária entre estadu rua ne’e, no oinsá atu hametin liután lasu kooperasaun entre instituisaun rua ne’e inklui kriasaun oportunidade hodi bele hetan formasaun jurídiku iha futuru, nune’e, bele fortalese setór justisa Timór-Leste nian.
Bainhira simu bainaka sira ne’e, ba dahuluk nian Prokuradór Jerál Repúblika Dr. Alfonso Lopez hato’o ninia agradesimentu ba Embaixadór Indonésia ninia disponibilidade hodi bele mai vizita MP. Iha biban ida-ne’e, PJR mós esplika kona-ba lala’ok MP nian, liuliu kona-ba estrutura no servisu hirak ne’ebé ezisti iha Prokuradoria Jerál Repúblika nia laran, hanesan; Estruturalmente, Prokuradoria Jerál Repúblika Demokrátika Timor-Leste, fahe tiha ba Ministériu Públiku no Prokuradoria Repúblika Distritál sira, ne’ebé, Prokuradoria-Jerál Repúblika mak nu’udar órgaun ne’ebé mak aas liu iha Ministériu Públiku, no diriji husi Prokuradór-Jerál Repúblika no hetan tulun husi Adjuntu Prokuradór-Jerál Repúblika sira.
Iha sorin seluk, PJR mós hato’o kona-ba kompeténsia servisu MP ninian hodi simu denúnsia, keixa, partisipasaun ka ordena instaurasaun prosedimentu kriminál, inklui fiskaliza no diriji inkéritu ba prosesu sira ne’ebé konsideradu presiza atu ezekuta, husu intervensaun husi Juiz hodi prátika aktus jurisdisionais iha dekursu inkéritu (ezemplu deklarasaun ba memória futuru), halo akuzasaun no defende iha julgamentu laran, halo ka hato’o rekursu no promove ezekusaun desizaun judisiais no pratika aktus hothotu tuir ne’ebé previstu iha Lei.
Aleinde ne’e, PJR mós esplika kona-ba dezenvolvimentu kapitál umanu, ne’ebé nu’udar dezafiu ida ne’ebé fundamentál tebes, PJR husu ba Embaixadór atu fó tulun MP liuhusi dalan hala’o formasaun ba majistradu no ofisiál justisa sira nu’udar eixu prioritáriu ita-nia asaun nian.
Iha fatin hanesan, Embaixadór Indonésia, Okto Dorinus Manik hato’o agradesimentu ba Ministériu Públiku Timor-Leste liuhusi ámbitu kooperasaun ida-ne’e, nia hateten mós katak Ministériu Públiku ho Embaixada Indonésia hanesan instituisaun ida ne’ebé importante tebes, prinsipalmente, ba Justisa ida loos no forte ba nasaun TL. Kooperasaun ida-ne’e hodi konstrui no dezenvolve formasaun majistradu no ofisiál justisa nian iha futuru mai.
Hirak ne’ebé mak partisipa iha reuniaun ne’e nia laran mak; Prokuradór Jerál Repúblika, Inspetora MP, Prokuradór Repúblika Distritál Dili, Xefe Gabinete-PJR, Diretór Jerál-PJR, inklui Embaixadór Repúblika Indonésia ho ninia ekipa sira. (Media PJR)