DÍLI – Kuarta, loron-13, fulan-Fevereiru, tinan-2019, Prokuradór-Jerál Repúblika Dr. José da Costa Ximenes halo enkontru ho Embaixadora Estadus Unidus Amerika (EUA) Kathleen M. Fitzpatrick iha salaun enkontru KSMP, edifisiu Colmera, Díli.

Iha enkontru ne’e Prokuradór-Jerál Repúblika Dr. José da Costa Ximenes hato’o agradesimentu ba Embaixadora EUA tanba durante ne’e fó ona apoiu formasaun iha área oioin ba majistradu sira atubele aumenta sira-nia esperiénsia no kapasidade, no hato’o mós bem-vindu ba Dr. David Paul Lewen nu’udar assesor legál foun ba Embaixada EUA.

PJR mós hateten tan katak Prokuradoria Jerál Repúblika iha majistradu sira hamutuk ema na’in – 32, no iha Gabinete tolu mak importante hanesan; 1). Gabinete Sentrál Kombate Korrupsaun no Kriminalidade Organizadu hodi haree kona-ba krime korrupsaun, krime finansiál no falsifikasaun dokumentu, gabinete refere importante tebetebes tanba ligadu ho kazu krime kompleksu, nune’e presiza nafatin formasaun, 2). Gabinete Servisu Kontensiozu Estadu ne’ebé reprezenta Estadu iha tribunál, no seluk tan mak; Kuradória Minór no Família ne’ebé estabelese ona iha MP, Kuradoria Minór no Família haree liu ba minoridade no violénsia doméstika ne’ebé afeta ba família no labarik sira.        

Aléinde ne’e Prokuradoria Jerál Repúblika iha kooperasaun  servisu investigasaun ne’ebé delega ba instituisaun estadu balun hanesan; CAC, PNSIK, PSIK no PNTL.    

Iha fatin hanesan Embaixadora EUA Kathleen M. Fitzpatrick aprezenta mós Dr. David Paul Lewen ne’ebé hala’o knaar hanesan Prokuradór Repúblika ida iha EUA no agora dadaun sai hanesan assesor legál ba Embaixada EUA.

Embaixadora esplika mós katak Dr. David Paul Lewen iha esperiénsia barak iha área judisiál, ne’ebé bele fahe ninia esperiénsia lubuk ida iha area oi-oin hanesan; kombate korrupsaun no krime organizadu, investigasaun, brankeamentu kapitais, krime siber ka krime elektróniku, krime falsifikasaun dokumentu, no krime kompleksu sira seluk tan.  

Ekipa ne’ebé mak akompaña PJR iha enkontru ne’e hanesan; Adjuntu Prokuradór-Jerál Repúblika Dr. Alfonso Lopez, Inspetora Dra. Zélia Trindade, Xefe Gabinete Eng. Carlito de Sousa, Diretora Jerál Ana Maria Pereira Carvalho. (Media/PJR)