Díli-loron-05, fulan-Novembru, tinan-2019, Prokuradór-Jerál Repúblika (PJR), Dr. José da Costa Ximenes, informa kona-ba situasaun kriminalidade iha teritóriu Timor-Leste ba Prezidente Repúblika (PR), Francisco Guteres Lu-Olo iha Palásiu Prezidente Bairopite.
Iha biban ne’e, Prokuradór-Jerál Repúblika informa ba PR kona-ba atividade servisu Prokuradoria Jerál Repúblika nian durante fulan-Outubru to’o ohin loron, hanesan atividade prosesuál, intervensaun Prokuradór Repúblika sira nian ba prosesuál la’o ho normál. Hafoin tiha ferias judisiáriu, nune’e, iha loron-15, fulan-Setembru servisu hothotu lao normál filafali.
Iha sorin seluk hafoin remata reuniaun ho PR, Prokuradór-Jerál Repúblika mós informa kona-ba situasaun kriminalidade sira ne’ebé akontese iha inísiu fulan-Novembru nian mak hanesan akontesimentu iha Kelekai-Lalolai ne’ebé sunu uma balun ho motorizada iha ne’ebá, PNTL ho Prokuradór sira iha Baucau halo servisu no kooperasaun ne’ebé di’ak tebtebes, sira konsege ka’er ema na’in-hitu, no iha hela sala detensaun no haruka ona autos ba MP, nune’e, agora sira promove ona ba Tribunál atu bele haree medida koasaun saida mak di’akliu ba sira.
Nune’e mós akontesimentu iha Gariwai, ne’ebé joven sira ataka malu no momentu ne’e kedas Polisia Nasionál Servisu Investigasaun Kriminál (PNSIK) konsege ka’er ona autór ida no agora dadaun iha hela sala detensaun hodi hein nia prosesu.
Aleinde ne’e, akontesimentu iha Maliana entre grupu Artes marsiais balun ataka malu, ne’ebé rezulta sunu uma iha ne’ebá, parte balun hanesan vítima no balun hanesan arguidu, nune’e mós vitimia sira ne’e fila ataka fali arguidu sira, agora PNTL ho Prokuradór sira servisu hamutuk hodi atende problema ne’e, tanba informasaun ba ita-nia Prokuradór sira iha ona, maibé auto partisipasaun seidauk tama iha gabinete Prokuradoria Maliana nian. Inklui mós akontesimentu iha Munisípiu Same, Prokuradór sira sei hein hela auto partisipasaun hodi prosesu krimi ne’e, iha loron finadu ne’e mak krimi aumenta uitoan, maibé ita nia Prokuradór sira hamutuk ho PNTL tenta tau matan kona-ba ba atividade prosesuál sira ne’e, tenik PJR.
Atividade seluk mak ami- nia membru Konsellu Superiór Ministériu Públiku (KSMP), Dr. Nelson Carvalho ho Dr. Matias Soares ne’ebé reprezenta MP, ninia mandatu hotu iha Fulan-Outubru, nune’e iha loron-25, fulan-Outubru ita halo fali eleisaun foun, nia rezultadu públika ona iha Jornál Republika iha loron-30, fulan-Outubru, ne’ebé, Dr. Jacinto Babo ho Dr. Gustavu Morreira mak sai membru konsellu foun, no membru konsellu hosi PN sira-nia mandatu mós hotu ona, ita manda ona karta ba PN atu bele haree, mantein ou eleitu seluk ne’e kompeténsia PN nian.
Ezekusaun Orsamentu Jerál ba tinan-2019 nian iha Prokuradoria Jerál Repúblika to’o loron 31, fulan-Outubru atinji ona porsentu 88, nune’e, ezekusaun orsamentu ba tinan ida-ne’e laiha problema tanba orsamentu ne’ebé atribui mai Prokuradoria Jerál Repúblika uitoan deit, (Media PJR).