Ministériu Públiku lakon nia Majistradu di’ak ida iha Loron-12, fulan-Fevereiru, tinan-2024, Matebian Dr. Hipólito hakotu nia jornada moris ho knár ne’ebé mak nia assume hanesan Prokuradór Repúblika iha Prokuradoria Primeira Intánsia Dili, ne’ebé mak simu posse iha loron-01, fulan-Jullu, tinan-2010. Matebian hanesan ema ida ne’ebé kompotente, edukadu no sivilizadu nune’e koretu teb-tebes iha ninia relasaun professionál ho kolega, superiór Ierárkiku sira no operadór judisiáriu hot-hotu.
Nune’e iha loron-15, fulan-Fevereiru, tinan-2024, familia boot MP halo seremónia solene hodi presta omenajén ikus ba Dr. Lito nian iha edifísiu Prokuradoria Jerál Repúblika, termina tiha seremónia solene iha PJR Colmera, kontinua ba vizita nia servisu fatin iha Prokuradoria Primeira Instansia Dili Matadoru, antes hodi ba halot iha nia moris fatin Munisípiu Ermera, suku Humboe, durante viajen hosi Dili to’o Ermera, akompaña hosi Família boot MP no família no kolega sira hosi Saudozo Lito nian.
Iha seremónia solene ne’e, Prokuradór Jerál Repúblika, Dr. Alfonso Lopez, hatete katak, “ Los duni Timor-Leste nia Majistratura MP nian sei ki’ak liu tanba labele konta tan ona ho Dr. Hipólito, maski nia husik ona mundu ida ne’e hodi ba fali mundu seluk, maibé, Dr. Hipólito nia memoria sei kontinua hola parte iha família boot MP.
Iha seremónia solene ne’e, partisipa direta Ministru Justisa foun, Dr. Sergio Hornai, Prezidente Tribunál Rekursu, Diretor PCIK, Koordenadóra Reforma Seitór Justisa, Adjuntu PDHJ, Alfela ho konvidadu no família Saudozu nian.
Saudozu Hipólito Exposto Martins Santa, Estadu Sivíl klosan, ho idade 59, moris iha Suku Ponilala, Postu Adm. Ermera, Munisípiu Ermera, 13 Agosto 1964, Rezidénsia atuál iha Aldeia TAT, Suku Bairro-Pite, Dom Aleixo, Munisípiu Dili, oan husi Aman Agostinho Exposto no Inan Esmeralda Exposto Sequeira (falecidos), matebian nudár oan mane ikun husi maun Alin hamutuk na’in 11. (Media-PGR)