Dili-Loron-01, fulan-Setembru, tinan-2020, Prokuradór-Jerál Repúblika (PJR) Dr. José da Costa Ximenes, hala’o abertura ba formasaun ofisiál justisa foun hamutuk nain-24 iha Prokuradoria Jerál Repúblika Colmera, formasaun refere ho durasaun tempu fulan-18.
Iha PJR nia deskursu hateten “ohin marka tan eventu importante ida ba ita hotu, ohin ba dala haat ofisialmente loke formasaun ba ofisiál justisa”, formasaun ne’e sei fahe ba faze rua, faze teórika hahú hosi loron-01, fulan-Setembru, tinan-2020 to’o loron-08, fulan-Marsu, tinan-2021 nune’e mós faze pratíka sei hahú iha loron-15, fulan-Marsu, tinan-2021 to’o loron-15, fulan-Marsu, tinan-2022.
Durante formasaun, Sekretária Konsellu euperiór Ministériu Públiku nian (KSMP), Sra. Paulina de Araújo mak sai hanesan koordenadora, hodi akompaña prosesu formasaun iha faze teórika ne’e hotu ami sei hanoin oinsá iha faze prátika di’ak-liu ita halo kedas kolokasaun, tanba iha distritu judisiál haat, iha ona sekretária, Prokuiradoria Distritál ida ne’ebé presiza liu apoiu rekursu umanu mak Prokuradoria Distritál Suai.
Iha okaziaun ne’e PJR mós husu atu kandidatu sira tenki ónestu, “ita halo deklarasaun kona-ba relasaun família ka maluk ruma iha laran, balu halo tiha deklarasaun dehan ninia família la iha, maibé nia familia iha, ha’u la gosta ida ne’e, tanba prosesu ne’e sei inisia sekarik ita boot la ónestu oinsá mak iha faze tuir mai bele konsege atinje, ne’e ha’u aviza de’it atu ita boot sira hatene, Ministéiru Públiku, Prokuradoria Jerál Repúbliku ne’e ita persiza ema ne’ebé ónestu.
Entretantu durante formasaun, formandu sira sei aprende matéria sira hanesan, Deontolojia profesionál, organizasaun judisiária, norma estatutária ofisiál justisa nian, rejíme juridíku funsaun públika, direitu prosesuál sivil, direitu prosesuál penál, tramitasaun inkéritu, dalen tétum, dalen portugéz no infórmatiku. (Media MP)