Gabinete Sentrál Kombate Korrupsaun no Kriminalidade Organizada

Gabinete Sentrál Kombate Korrupsaun no Kriminalidade Organizada (GSKKKO), ne’ebé instala iha Prokuradoria Jerál Repúblika, hanesan área intervensaun Ministériu Públiku nian ne’ebé espesializa iha investigasaun ba krime hirak ne’ebé komete bainhira ezerse funsaun públika no krime aneksu sira, hanesan brankeamentu kapitál no, aleinde ida-ne’e, iha investigasaun krime kompleksu sira hanesan tráfiku droga, tráfiku umanu, kontrabandu no esplorasaun jogu ilegál sira, no seluk seluk tan.

Gabinete ne’e, ne’ebé funsiona iha dependénsia ierarkia direta ba Prokuradór-Jerál Repúblika, José da Costa Ximenes, nia  atuasaun ho kompeténsia iha nível nasionál, nu’udar responsável hodi halo investigasaun ba krime sira korrupsaun no kriminalidade organizada ne’ebé envolve valór/prejuízu superiór hosi US$10,000.00 (Dólar Amérikanu rihun sanulu) ka envolve membru ka titulár hosi órgaun soberania sira hanesan arguidu, aleinde atua iha krime hothotu ho tipu ida ne’e ne’ebé akontese iha Distritu Dili.

Haree ba efeitu negativu hosi krime korrupsaun no krime koneksu sira iha kompetitividade hosi ajente ekonómiku sira no ninia kapasidade ne’ebé boot hodi afeta administrasaun ne’ebé di’ak no justisa sosiál, atuasaun hosi GSKKKO hodi reforsa atu bele kombate forma sira kriminalidade nian hosi ninia kompeténsia, la’ós foka de’it ba prosekusaun penál, maibé promove mós identifikasaun, apreensaun, perda no konfisku instrumentu no produtu sira krime nian, hanesan forma ida hodi retira hosi kriminozu meiu finanseiru sira atu labele aumenta tan no, iha tempu hanesan, promove justisa reparativa liuhosi rekuperasaun ativu sira. GSKKKO harii tiha ona iha fulan-novembru, tinan-2015, liu hosi Sirkulár n.° 01/PGR/2015, no sai hanesan evolusaun ida hosi Gabinete Kombate Korrupsaun no Krime Organizadu, ne’ebé hahú hosi tinan-2014.

Atualmente, GSKKO iha majistradu nai’n haat no ofisiál justisa na’in ualu ne’ebé destakadu ho rejime eskluzividade, aleinde inklui iha ninia estrutura unidade Auditoria no Perísia Finanseira ida, ne’ebé sei dezenvolve daudaun.