Dili-loron-16, fulan-Jullu, tinan-2021, Koordenadora Gabinete Sentrál Kombate Korrupsaun no Kriminalidade Organizada (GSKKKO), Dra. Lidia Soares, hala’o reuniaun ida ho ofisiál justisa sira ne’ebé haknaar iha gabinete ne’e hodi ko’alia kona-ba planu servisu no relasaun servisu ho instituisaun relevante sira seluk.
Iha biban reuniaun nian ne’e, Koordenadora GSKKKO ne’e hateten katak, “bainhira muda ona ba edífísiu foun, iha futuru GSKKKO sei jere rasik ninia orsamentu, tanba hosi Servisu Apoiu Tékniku no Administrasaun (SATA) mós sei koloka direta ba iha Gabinete ne’e hodi fó apoiu ba servisu sira hanesan Finansas, IT, Media no Lojístika, nune’e husu atu ta’u responsavél ba seksaun hotu tuir estatutu ofisiál justisa nian”.
Koordenadora ne’e salienta mós katak, GSKKKO sei mantein nafatin hala’o kooperasaun ho instituisaun relevante sira seluk hanesan Komisaun Anti Korrupsaun (KAK), Polísia Sientifiku no Investigasaun Kriminál (PSIK), Polísia Nasionál Investigasaun Kriminál (PNSIK), Autoridade Aduaneiru no Tributáriu, inklui ho parte sira ne’ebé iha relasaun servisu ho gabinete ne’e.
Responsavél másimu ba gabinete ne’e apela mós ba ofisiál justisa sira katak, “kada ofisiál justisa hosi Prokuradór titulár nian tenki kontrola pasta arkivu, pasta akuza, pasta rekursu no pasta notifikasaun inklui mós julgamentu nian”. Nia mós iha hanoin atu ta’u responsavél ba objetu sira apreendidu nian, no presiza halo formasaun kona-ba arkivamentu no maneira oinsá atu guarda objetu sira ne’e”.
Iha sorin seluk, Koordenadora GSKKKO ne’e iha ona planu atu kontrata ofisiál justisa internasionál ida atubele fó apoiu ba gabinete ne’e, “presiza ofisiál internasionál ida atu bele fó apoiu ba ofisiál justisa sira”.
Hafoin tiha ramata reuniaun ne’e, Koordenadora GSKKKO hamutuk ho Xefe Gabinete, Diretór IT no ofisiál justisa sira hala’o kedas vizita ba iha edifísiu foun GSKKKO nian ne’ebé lokaliza iha edifísiu Prokuradoria Jerál ninia kotuk. (Media MP).