Dili-loron-12, fulan-janeiru, tinan-2023, Prokuradór Repúblika. Dr. Napoleão Soares da Silva, partisipa iha seremónia lansamentu relatóriu Forum komunikasaun ba feto Timor-Leste (FOKUPERS) nian durante tinan-12 ligadu ho implementasaun lei no 7/2010, kona-ba Kontra Violénsia Doméstika iha Timor-Leste, iha lansamentu ne’e mós Prokuradór hato’o nia observasaun kona-ba lei refere, iha City 8 Manleuana.
“Dezafiu no avansu ne’ebé mak ita hetan durante implementasaun lei Kontra Violémsia Domestíka, dezafiu ne’e tékniku la halimar, ida mak ohin ha’u lé ona iha livru hakerek barak ona kona-ba violénsia doméstika, ida mak kultura partelineár no patriakál, hanesan ha’u hola feto ruma depois ha’u fó folin barak ha’u baku karik baku ha’u nia karau, osan sasan sira ne’e tanba ne’e mak ita hanoin katak saida mak ita halo ne’e los maibé lalos, ne’e hola parte mós hanesan violénsia doméstika”, Dr. Napoleão esplika liu hosi nia palestra hanesan oradór ida mós iha seremonia refere.
Nia akresenta tan katak, “dezafiu ida mak ha’u dehan tékniku, tanba ita nia hela fatin, kuandu maluk sira hosi distritu mai hela iha Dili, depois halo tiha problema sai tiha hosi kos, fila fali ba distritu, nune’e defisil atu atua, tanba iha problema polísia tenki atua no lori ba Minstériu Públiku hodi halo investigasaun ba prosesu ne’e”.
Prokuradór ne’e akresenta tan katak “iha Ministériu Públiku ema hanaran turnu, liu hosi turnu mak rejistu no identifika krime, se krime Violénsia Domestika tenki ba iha Seksaun sentrál, sentral ba fali iha Prokuradór ne’ebé kaer ba krime ho forma violénsia doméstika foin prosesa, rekolla provas kompletu ona ita lori ba tribunál, tanba ne’e mak dala ruma ita tenki hein uitoan”. (Media-PJR)