Díli— Tersa, loron-03, fulan-Setembru, tinan -2019, Prokuradora Repúblika
Dra. Lidia Soares fó formasaun ba
investigadór sira Komisaun Funsaun Publika (KFP) nian, kona-ba Kódigu Prosesu
Penál no Kodigu Penál.
Bainhira halo abertura ba formasaun refere ne’e, Adjuntu Prokuradór Jerál Repúblika Dr. Alfonso Lopez dehan katak; formasaun ida-ne’e destina tiha ona iha loron-01, fulan-Agustu, tinan-2018, no Ministériu Públiku (MP) ho Komisaun Funsaun Públika (KFP) asina ona Nota Memorandu Entedimentu (NME) ida hodi hametin liután lasu kooperasaun servisu iha futuru.
APJR hatutan tan katak kooperasaun ne’e, “la’os hatudu idea mamuk, maibé tenke produs rezultadu konkreta husi formasaun ida-ne’e, ita tenke ezekuta ho pratika, ita hotu iha servisu espesífiku ba atuasaun nian, ita hotu servisu ba Administrasaun Publika ida ne’ebé hatur iha legalidade, izensaun, transparénsia, no promotora ba oportunidade sira ne’e”.
Iha sorin seluk, formádora Dra. Lidia hato’o
katak, “atu hetan rezultadu investigasaun ida ne’ebé di’ak; tenke investiga ho
kualidade no profisionalizmu, iha prova ne’ebé sufisiente ka forte, hodi deskobre verdade materiál
hosi krime sira, entaun, investigádor tenke halo pergunta ne’ebé kualidade no pergunta
refere tenke relevante ho krime ne’ebé akontese”.
Formádora ne’e mós salienta liután katak, investigadór
sira tenki uza métodu investigasaun ida ho di’ak, kuandu funsionáriu ida
komete kazu korrupsaun, investigadór sira tenke
prepara ona prosesu inkéritu hahú hosi faze prosesuál hanesan
finalidade investigasaun ba krimi ida hodi buka tuir; Oinsa
akontese? Kuandu?
Iha ne’ebé? Tanba saida? no Sé mak sai arguidu iha prosesu ne’e. Investigadór sira tenke halo pergunta ho kualidade, pergunta refere tenke relevante. Ho ida-ne’e mak “ha’u sente situasaun sira ne’e, ita boot sira
tenke investiga ho kuidadu tanba ita fó kondenasaun ba ema ida tenke ho baze, kuandu la iha baze ema la fiar
ita, maibé ita iha baze fundamentál atu ema bele tau respeita ba investigadór
sira”.
Nia dehan katak, atu hetan finalidade
iha prosesu kriminál ida halo akuzasaun ho ekipamentus, halo akuzasaun kuandu
provas tenke kompletu ba arguidu ida iha faktu no iha provas ne’ebé apoiu
faktus mak ita boot sira bele akuza.
Hafoin tiha ne’e, iha loron bé tuirmai formadór Prokuradór Internasionál nian, Dr. António Pedro Borges aprezenta kona-ba Responsabilidade Dixiplinár, Prosesu Dixiplinár no Instrusaun Prosesu Dixipliná nian bazeia ba estatutu Funsaun Publika nian. (Media PJR).