Dili-loron-9, fulan-Dezembru, tinan-2019, Embaixada Uniaun Europeia iha Timor-Leste organiza semináriu ida kona-ba Supervizaun finansas públika iha Timor-Leste no projetu Jere Osan Povu nian ho Di’ak, semináriu refere ne’e realiza iha Otél Timor, ne’ebé hahú husi loron-9 to’o loron-13, fulan-Dezembru, tinan-2019.
Reprezentante husi Ministériu Públiku (MP) ne’ebé mak partisipa iha semináriu ne’e mak hanesan; Diretór Nasionál Informasaun no Komunikasaun, Eng. Edilson M.A Ximenes, Diretora Finansas no Orsamentu, Anabela Lessu, Sekretáriu Prokuradoria Distritál Dili, Carlos da Costa, Sekretária Adjuntu-PJR, Angelica Pedrosa, Xefe Sekretáriu GSKKKO, Martinho Caet no Ofisiál Justisa Ramiro Lelo Bato no Mariana Martins de Sá inklui mós kargu Xefe-Departamentu sira.
Embaixadór Portugal iha Timor-Leste, Jose Pedro Machado Vieira mak ho ofisiálmente loke semináriu ne’e, iha biban ne’e, nia hato’o ninia diskursu hodi husu ba partisipante sira ne’ebé partisipa iha semináriu ida-ne’e atu aproveita tempu ho didi’ak, tanba ita boot sira sei hetan materia oioin hosi oradór sira ne’ebé la hanesan.
Iha sorin seluk, Embaixadór Uniaun Europeia iha Timor-Leste, Andrew Jacobs mós hateten katak, “ita-nia semináriu ho tema Supervizaun Finansas Públika iha Timor-Leste, tema ne’ebé interesante tebtebes tanba ne’e husu ba kargu Diretór no Xefia sira atu aproveita oportundiade ida-ne’e’’.
Nia akresenta tán katak “Iha Timor-Leste, instituisaun governu no sosiedade sivil, iha espasu no kapasidade atu fornese no fó apoiu ne’ebé importante hodi garanti dezenvolvimentu ne’ebé agora daudaun la’o hela, nune’e mós semináriu ne’e hanesan kontribuisaun ida hodi kapasita ajente foun sira liu-liu hirak-ne’ebé okupa kargu xefia sira, hodi bele dinamiza, kontribui no asegura jestaun orsamentu nian.
Partisipante ida husi Ministériu Públiku Mariana Martins de Sá ne’ebé hanesan ofisiál justisa MP nian hateten katak “semináriu ne’e interesante tebes mai ami ofisiál justisa tanba bele hatene maneira oinsá atu halo supervizaun ba finansas públika, nune’e mós hosi instituisaun relevante sira fahe esperiénsia servisu nian ba malu atu bele hametin liután profisaun sira ne’ebé ami iha hodi asegura no buka-tuir osan povu nian, atu nune’e ita-nia na’i-ulun sira bele jere osan povu nian ho di’ak.
Semináriu ne’e ensera diretamente husi Embaixadór Uniaun Europeia no Embaixadór Portugal iha Timor-Leste, no tuirmai fahe mós sertifikadu valorizasaun ba partisipante sira. Entidade sira ne’ebé mak hola parte iha semináriu refere ne’e mak hanesan; Ministériu Públiku (MP), KAK, PDHJ, Tribunál Rekursu no CEPAD. (Media PJR)