Dili-Loron-10, fulan-Janeiru, tinan-2022, Prokuradór Jerál Repúblika (PJR), Dr. Alfonso Lopes ho Adjunta PJR, Dra. Remizia de Fátima, hato’o relatóriu Ministériu Públiku (MP) tinan-2021 nian ba Prezidente Repúblika (PR), Dr. Francisco Guterres Lú-Oli iha Palásiu Prezidente, Bairru-Pité.
“Ami nia enkontru ohin akompaña hosi APJR, informa ba PR kona-ba movimentasaaun prosesuál durante tinan ida nian, hahú hosi loron-01, fulan-Janeiru, to’o loron-31, fulan-Dezembru, tinan-2021, kazu entrada iha tinan-2021 hamutuk prosesu 5.135, ho esforsu ne’ebé Majistradu MP hala’o konsege termina prosesu 5.189, nune’e mak prosesu pendente ba tinan-2022 hamutuk, 2.749, nune’e mós prosesu mai hosi tinan-2020 hamutuk 2.824, entaun ita redus proses pendente hamutuk 54, ho ida ne’e ita bele dehan, Majistradu MP, ofisiál justisa, rejime jerál, entidade relevante sira, no órgaun Polísia Kriminál sira hatudu produtividade ne’ebé pozitivu tebes, tanba prosesu pendente konsege redús iha tinan-2021” dehan PJR hafoin ramata reuniaun ho Prezidente Repúblika.
Iha biban ne’e mós PJR informa kona-ba rezultadu hosi Kazu Topu Honis Oecusse, “informa mós ba PR kona-ba desizaun Tribunál Distritál Oecusse nian ba leitura akordaun katak, desizaun ikus liu Tribunál altera medida koasaun prizaun domisiliária ka prizaun preventiva ba arguidu ho pena únika tinan-12, nune’e mós tenki selu danu no materiál sira kada vítima 4.000, tanba konta ho taxa, agora MP hein hela notifikasaun hosi arguidu nia advogadu, karik advogadu hosi arguidu nian halo rekursu, nune’e mós parte MP prontu atu halo resposta ba rekursu”.
Iha enkontru mensál ne’e, Prezidente Repúblika enkoraja MP atu forsa nafatin hodi ezerse funsaun sira tuir lei, “PR nia mensajen ba MP atu forsa nafatin no nafatin hakruuk ba lei no la lika rona polítika, ezerse funsaun ho di’ak no responsablidade”, (Média PJR).