Dili – Iha Kinta, loron-20, fulan-Fevereiru, tinan-2020, Prokuradór-Jerál Repúblika, Dr. José da Costa Ximenes hato’o ninia agradesimentu ba prezensa vise Prezidente Komisaun A Parlamentu Nasionál ho ninia ekipa ne’ebé hala’o vizita mai MP, Colmera.
Bainhira simu bainaka sira ne’e, Prokuradór-Jerál Repúblika, Dr. José da Costa Ximenes hato’o katak parte ida husi objetivu importante vizita ne’e mak hodi konvida entidade hotu-hotu mai vizita MP antes atu tama ba iha komemorasaun loron aniversáriu MP nian ba dala ruanulu iha tinan ida-ne’e, nune’e, bele rona diretamente entidade hothotu nia hanoin no krítika kona-ba peregrinasaun MP nian hahú husi tinan-2000 to’o tinan-2020.
PJR afirma liután katak ezisténsia Ministériu Públiku nian iha Timor-Leste importante tebtebes no iha espíritu atu servi povu, promove no garante direitu konstitusionál atu bele hetan asesu ba justisa. Estabelesimentu Ministériu Públiku hahú durante tempu governu Tranzitóriu Nasoens Unidas nia ukun, liuhusi regulamentu UNTAET n.o 11/2000, Janeiru tinan-2000. Iha Regulamentu UNTAET n.o 16/2000, loron 6, fulan Juñu, mak foin define didi’ak organizasaun, kompeténsia no estrutura servisu, nune’e, loron ida-ne’e mak konsidera tiha hanesan loron aniversáriu Ministériu Públiku nian, tuir deliberasaun n.o 58/CMSP/2014, Konsellu Superiór Ministériu Públiku nian.
Iha biban ne’e, PJR mós hatutan tan katak iha Ministériu Públiku nia laran ezisti gabinete espesializadu tolu, hanesan; Gabinete Sentrál Kombate Korrupsaun no Kriminalidade Organizadu (GSKKKO) ne’ebé lidera husi Dr. Adérito Tilman, gabinete ne’e rasik hetan supervizaun diretamente husi Adjuntu Prokuradór-Jerál Repúblika, tuirmai mak Gabinete Kontensiozu Estadu no ikusliu mak Kuradoria Menór no Família ne’ebé eziste iha Prokuradoria Distritál sira. Kuradoria Menór no Família ne’e rasik toma-konta liuliu kona-ba asuntu violénsia doméstika no labarik ho idade ki’ik sira.
Iha fatin hanesan, Vise Prezidente Komisaun A Parlamentu Nasionál, Francisco Vasconselo hateten tan katak sira apresia servisu Ministériu Públiku nian durante ne’e, MP tenke livre husi intervensaun polítiku sira, hodi inplementa justisa loloos iha Timor-Leste, tuir espetativa públiku nian katak MP nu’udar instituisaun ida ne’ebé mak importante tebtebes iha Timor hodi hala’o justisa ida di’ak no ho kualidade ba ita-nia povu sira.
Nia afirma liután katak iha tinan-2000 liubá, MP infrenta dezafiu barak, inklui rekursu umanu no rekursu finanseiru ne’ebé mínimu, no nafatin presiza ema barak nia apoiu no kontribuisaun hodi bele suporta intituisaun ne’e la’o ba oin, nune’e sai di’ak liután iha futuru.
Delegasaun ne’ebé hola parte iha vizita ida ne’e kompostu husi Vise Prezidente Komisaun A PN, Francisco Vasconselo no Deputadu Adriano do Nacimento, no akompaña mós husi Adjuntu-PJR, responsável Gabinete Kontensiozu Estadu, Sekretariu Superiór KSMP, Xefe-Gabinete no Diretora Jeral. (Media PJR)