Díli- iha loron-16, fulan-Outubru to’o loron-08, fulan-Novembru tinan 2019, Ministériu Públiku ho ofisialmente loke vaga ofisiál justisa nian ba públiku sira, no konkorente hamutuk ema rihun ida, ualunulu-resin lima (1085) mak konsege rejista ona ba vaga refere ne’e.
Hafoin juri simu aplikante sira-nia dokumentu, nune’e, juri sira kontinua halo avaliasaun no selesaun ba dokumentu sira hosi aplikante rihun ida resin ne’e iha de’it aplikante atus haat sanulu resin hitu (417) mak pasa iha selesaun dokumentu no iha posibilidade atu tuir prova eskrita iha fulan-Dezembru nia laran.
Informasaun ne’ebé hato’o hosi Prezidente Juri ne’ebé nu’udar mós Sekretária Superiór Prokuradoria Jerál Repúblika, Paulina de Araújo Correia katak,”aplikante rihun ida resin ne’e kompostu hosi feto hamutuk atus haat hitunulu resin ualu (478) no mane hamutuk atus neen resin hitu (607), nune’e iha prosesu selesaun dokumentu konkorente mane nian hamutu atus rua ruanulu resin tolu (223) ho feto atus ida sianulu resin neen (196) mak pasa iha etapa selesaun dokumentu.
Prezidente Juri ne’e akresenta tan katak, konkorente sira ne’ebé la pasa iha prosesu selesaun dokumentu ne’e tanba barak mak la kumpri rekezitu sira ne’ebé fó sai ona iha kuadru avizu, “aplikante sira ne’ebé la pasa iha prosesu selesaun dokumentu ne’e, tanba balun dokumentu la legaliza, balun falsifika no mós balun la atualizadu, nune’e iha aplikante mane hamutuk atus tolu ualunulu resin hat (384) no feto atus rua ualunulu resin rua (282) mak la pasa iha selesaun dokumentu”.
Iha sorin seluk, aplikante ida ne’ebé lakohi fó sai nia identidade sente orgullu ho prosesu rekrutamentu vaga ofisiál justisa ne’e “ ha’u pesoálmente sente kontente ho prosesu rekrutamentu ne’e, tanba vaga ne’e ita mai rejista de’it mós presiza dokumentu oioin, ida-ne’e hanesan parte ida karik oinsá MP atu hanorin sidadaun sira atu trata dokumentu identidade ida-idak nian”.
Nia realsa tan katak, ha’u apresia tanba prosesu rekrutamentu ne’e la’o ho justu, tanba bainhira ami mai rejista iha mós rekezitu ida kona-ba deklarasaun relasaun famila iha MP, klaru katak aplikante ne’ebé iha famila balún servisu
ona iha MP, nia sei la pasa iha prosesu selesaun dokumentu, tenik aplikante ne’e, (Media PJR).