DILI – Membru sira Konsellu Jerál Sentru Fomasaun Jurídika (akrónimu hosi portugés, CFJ), inklui Prokuradór-Jerál Repúblika, José da Costa Ximenes, Juís Tribunál Rekursu, Deolindo dos Santos, Defensór Públiku Jerál, Sergio Hornai, Prezidente Konsellu Jestaun no Disiplina Advokasia nian, Nelinho Vital, Diretora SFJ, Marcelina Tilman da Silva, no Ministru Justisa, Ivo Valente (prezide), hala’o enkontru ba dahuluk iha tinan-2017 ne’e iha kinta-feira (26/01/2017).
Sorumutu ne’e, ne’ebé realiza iha salaun enkontru CFJ, ho ajenda atu fó apresiasaun ba relatóriu ezekusaun programa formasaun tinan-2016 ninian, aleinde diskute no aprova planu anuál ba formasaun tinan-2017 ninian, inklui kona-ba prosesu rekrutamentu ba formadór majistradu internasionál sira hosi Estadu membru Komunidade País Lian Portugés (akrónimu hosi portugés, CPLP) nian hodi fó apoiu iha atividade sira kapasitasaun no formasaun ne’ebé CFJ atu hala’o, liu-liu ba realizasaun VI Kursu ba Majistradu no Defensór Públiku sira.
Iha reniaun ne’e Ministru Justisa agradese ba prezensa membru konsellu sira, no loke diskusaun kona-ba kualidade atendimentu Justisa nian ne’ebé lao hela hodi bele haree ba futuru formasaun ba juís, prokuradór, defensór no advogadu sira. Durante enkontru refere mós, membru sira Konsellu CFJ aprova estratéjia ba formasaun sira ne’ebé tempu badak atu realiza. (Media PJR)