Dili-Segunda, loron-15,
fulan-Jullu, tinan-2019, Prokuradór-Jerál Repúblika (PJR), Dr. José da Costa
Ximenes espresa ninia satisfasaun ho
servisu hamutuk ne’ebé hala’o ona entre Estadu Unidus Amerika ho Prokuradoria
Jerál Repúblika bainhira partisipa iha treinamentu ne’ebé realiza hosi Embaixada
Estadus Unidus Amerika nian iha Timor-Leste ho tema”Dezenvolve Forsa-Tarefas no
Investigasaun Proativu” iha Tower-Fatuhada.
Iha ninia intervensaun ne’e PJR hato’o mós gratidaun no satisfasaun ba servisu
hamutuk entre Prokuradoria Jerál Repúblika Timor-Leste ho Embaixada EUA iha
Timor-Leste, “aproveita oportunidade ida-ne’e ha’u hakarak hato’o ha’u-nia
gratidaun no espresa ha’u-nia satisfasaun ba servisu hamutuk ne’ebé mak hala’o
ona entre Estadu Unidus Amerika ho Prokuradoria Jerál Repúblika, hahu desde
2009 to’o agora. Majistradu no ofisiál justisa barak mak aproveita ona
formasaun oioin iha rai-laran no rai-li’ur, ha’u hanoin la’ós Ministériu Públiku
de’it, maibé mós gabinete PNTL no Komisaun Anti Korrupsaun inklui instituisaun sira seluk iha Timor-Leste, ha’u
agradese no apresia ho kooperasaun ida-ne’e, tanba rezultadu monstra katak, iha
aumentu ba sira-nia kapasidade.
PJR mós hateten liután katak “ohin monstra tan dala ida, EUA liuhusi ninia
Embaixada fornese ona treinamentu ida-ne’e, la’ós invole de’it Majistradu MP
nian, maibé instituisaun judisiáriu hotu, ha’u admira, ida-ne’e importante tebtebes
ba MP ho PNTL tanba ita-nia servisu Task Force ho servisu ekipa ne’e mak xave
importante tebes, atu kriminozu labele dividi ita, ha’u hatene dalaruma PNTL no
PSIK, sira dala rumu sura-malu, oinsá ita hotu, uitoan ka barak ita hamutuk
hodi kontribui ho forsa ida de’it, tenik PJR.
Prokuradór-Jerál Repúblika mós hateten katak “krime trafiku umanu hanesan
krime transnasionál, bainhira akontese kazu droga ida, entaun, mínimu iha krime tolu mak iha laran, trafiku
umanu, korrupsaun ho brankeamentu kapitál, droga la’ós krime ne’ebé hamriik
mesak, tanba ne’e oinsá ita-nia kooperasaun ho nasaun viziñu sira, hanesan Indonezia
ho Australia.
Iha fatin hanesan, Embaixadora
EUA iha Timor-Leste, Kathleen Fitzpatrick, ofisiálmente loke treinamentu ne’ebé
sei hala’o durante loron-3 nia laran,
hahú husi, 15-18, fulan-Jullu, tinan-2019, no iha ninia intervensaun nia hateten
katak “Estadus Unidus iha programa partisipativu ho ideolojia ida de’it atu
hamutuk liután hodi responde ba dezafiu sira
kona-ba tráfiku umanu nian.
Embaixadora ne’e mós
hateten katak “ha’u hakarak konsentra liuliu ba tráfiku umanu. Tráfiku umanu
hanesan krime ne’ebé halo ema sai eskravu no halakon dignidade no liberdade
husi ema milliaun iha mundu tomak, importante mós lembra katak tráfiku
umanu mós hanesan krime transnasionál.
Iha sorin seluk, Komisariu Komisaun Anti Korrupsaun, Sergio Hornai iha
ninia intervensaun hato’o katak “Timor-Leste loron
ba loron buka konsolida nia instituisaun liuhusi ninia kuadru sira tanba ne’e, ami hanoin katak dezenvolvimentu insititusionál no mós dezenvolvimentu kuadru profisionál iha setór justisa introkavel, nune’e hakarak agradese
ba EUA tanba sira-nia prontidaun hodi apoiu nafatin Timor-Leste, liuliu oinsá mak atu eleva kualidade servisu profisionais sira nian iha setór justisa liuliu iha área investigasaun nian”.
Hirak ne’ebé partisipa iha treinamentu ne’e mak hanesan; Majistradu MP, Investigadór
KAK, PSIK, PNSIK, Alfandega no mós PNTL. (Media
PJR)