Bobonaro:Tuir data estatísika
Komandu Polísia Munisípiu Bobonaro hatudu katak krimi Violensia Doméstika aas
iha Bobonaro tuir fali Krime kontrabandu, informasaun hanesan mós ho data
Prokuradoria Repúblika Distritu Bobonaro nian.
Númeru krime ne’ebé barak liu, liuliu iha Munisípiu
Bobonaro, primeiru mak krimi Violénsia Doméstika ho karakter ofensa integridade
Físika simples, tuir fali mak krimi kontrabandu, Krime kontrabandu iha tinan
ida ne’e kuaze lubuk ida mak entrada, seidauk tan ho pendente tinan kotuk nian,
hatete Prokuradór Repúblika Distritu Bobonaro, Dr. João Marques.
Nia hatutan tan katak, “normalmente barak liu objeitu apriensaun
husi krime kontrabandu hanesan mina-rai, sigaru, konaba mina-rai bainhira auto
notísia ne’e enkamiña ona mai iha MP mak sei rejistu iha sistema, depois
imediatamente husu kedas validasaun no mós husu ba Tribunál atu bele dekreta
venda antisipada, tanba ita nia fatin atu salva guarda objetu sira ne’e, liuliu
mina-rai laiha kondisaun, tanba rai de’it iha li’ur, kuandu demora bele afeta ba
nia kualidade no mós nia kuantidade, tenik Prokuradór Repúblika ne’e.
Iha sorin seluk, Superintendente Xefe Polísia Munisípiu
Bobonaro, Armando Monteiro katak, “Estatístika krime iha Munisípiu Bobonaro
tinan-2019 nian kompara ho tinan uluk, ninia mudansa signifikante uituan, maibé
iha estetíka hatudu nafatin asaun integridade fízika simples mak sei primeiru
no tuir fali mak krimi kontrabandu”.
Relasiona ho krime ne’ebé akontese, Komandu PNTL
Munisípiu Bobonaro no Prokuradoria Repúblika Distritu Maliana buka meius atu
halo prevensaun liuhusi deseminasaun lei Violénsia Doméstika nian ba komunidade
sira, ”ita esforsu makaas hodi kolabora ho Prokuradoria Repúblika Distritu Bobonaro
liuhusi investigasaun ho sub-seksaun VPU nian ita halo deseminasaun lei
violensia doméstika, kada eskuadra liuhusi ofisiál Polísia-Suku iha ida-idak
nia suku, esforsu-an oinsá atu reduz ita-nia estatístika ne’ebé mak sa’e”,
tenik nia.
Iha fatin seluk, komunidade ida ne’ebé lakoi temi naran
iha entrevista ne’e, husu atu ba futuru estadu estabelese mós Tribunál iha
Munisípiu Bobonaro, “ha’u hanesan komunidade babain ida, ha’u husu ba ita nia
estadu liuliu parte justisa nian, atu ba futuru instala mós Tribunál iha
Bobonaro, tanba dala barak ha’u haree julgamentu ba kazu sira sempre ba julga
fali iha Suai, ida ne’e halo terus ami komunidade liuliu ba maluk sira ne’ebé
sai hanesan vitima”.
“Iha Munisípiu Bobonaro ne’e, Prokuradoria no Polísia
kompletu ona nusa mak tribunál laiha ?, ha’u sente hanesan komik uitoan tanba
Polísia kaer suspeitu no vítima iha Maliana, investiga iha Maliana, no julga
fali ba iha Suai, ida ne’e estadu no instituisaun justisa sira presiza haree no
tetu didi’ak ida ne’e”, (Media PJR).