Tibar – Liquisa, iha Tersa, loron-28, fulan-Janeiru, tinan-2020, Konsellu Superiór Ministériu Públiku (KSMP) hala’o retiru anuál tinan-2019 iha Tibar, Postu-Administrativu Liquisa Vila, Munisípiu Liquisa.

Objetivu husi retiru ida-ne’e hodi  ko’alia kona-ba servisu KSMP nian  inklui mós ninia progresu ne’ebé mak atinji ona no dezafiu hirak ne’ebé KSMP enfrenta durante  tinan-2019.

Bainhira halo ninia intervensaun, Prokuradór-Jerál Repúblika, Dr. José da Costa Ximenes hateten katak, “retiru anuál ida-ne’e hodi ko’alia kona-ba servisu KSMP nian durante     tinan-2019, iha biban ne’e aprezenta mós planu atividade Prokuradoria-Jerál Repúblika nian ba tinan-2020, kona-ba Servisu Apoiu Tékniku no Adminístrativu (SATA), analiza dadus estatístiku produtividade no progresu majistradu MP nian inklui analiza dadus estatístiku Prokuradoria Distritál sira nian no mós servisu ofisial Justisa sira nian durante tinan-2019”.

Kona-ba planu atividade MP nian, PJR hato’o katak; tinan ida-ne’e sei halo progresaun ba ofisiál Justisa sira husi eskalaun ida ba eskalaun seluk inklui mós progresaun majistradu sira, KSMP sei tau ajenda hodi diskuti fila-fali, nune’e, bele haree didi’ak progresaun majistradu sira nian no halo avaliasaun profunda ba servisu majistradu sira nian.

PJR mós hateten liután katak; “ikus husi mandatu PJR nian mak atu husu ba Servisu Apoiu Tékniku no Adminístrativu (SATA) katak ba tinan ida-ne’e OJE (milaun rua) bainhira aprova ona mak sei aloka tomak  ba manutensaun de’it, tanba edifisiu sira halo iha tinan-2006 to’o 2012, to’o ohin loron laiha manutensaun, nune’e, bainhira  mandatu termina buat hotu tenki di’ak hodi nune’e bele garante servisu MP nian sai di’ak liután iha futuru”.

Iha retiru ida-ne’e, Inspetora MP, Dra. Zélia Trindade  fó mós agradesimentu ba Prezidente KSMP no membru sira katak; foin primeiru partisipa iha retiru anuál 2020 KSMP nian, hodi aprezenta relatóriu KSMP nian durante tinan-2019, ne’ebé mak hakerek ona atividade KSMP nian haktuir ho kompeténsia ka atribuisaun ne’ebé fó ba Konsellu Superiór Ministériu Públiku (KSMP) nu’udar órgaun superiór ba jestaun nian no haree mós dixiplina majistratura Ministériu Públiku nian.

Iha reuniaun ne’e nia laran, membru KSMP nian ida ne’ebé hetan fiar husi Governu Dr. Rui Pereira dos Santos, hato’o ninia apresiasaun ba KSMP ninia relatóriu ne’ebé nakonu ho servisu lubun ida ne’ebé KSMP halo durante tinan-2019.

Retiru anuál ne’e, prezide diretamente husi Prokuradór-Jerál Repúblika, Dr. José da Costa Ximenes ne’ebé nu’udar mós Prezidente Konsellu Superiór Ministériu Públiku (KSMP) nian, no hetan partisipasaun husi membru sira KSMP nian mak hanesan; membru ne’ebé hili husi majistradu Ministériu Públiku nian mak Dr. Jacinto Babo Soares  nu’udar vise Prezidente (KSMP), no Dr. Gustavo Augusto da Silva Moreira, membru dezignadu husi Prezidente Repúblika mak, Dra. Maria Fátima Correia no Dr. Ivo Jorge Valente, no membru ne’ebé hili husi governu mak Dr. Rui Pereira dos Santos no membru ne’ebé hili hosi Parlamentu Nasionál mak Dr. Filipe Rodrigues Pereira, Inspetora MP Dra. Zélia Trindade no akompaña husi Sekretaria KSMP, Xefi Gabinete-PJR, Diretora Jerál, (Media PJR)