Díli-Prokuradór-Jerál Repúblika (PJR), Dr. José da Costa Ximenes, iha loron Segunda-07, fulan-Outubru, tinan-2019, relata atividade  Ministériu Públiku (MP) nian durante fulan-setembru nia laran ba Prezidente Repúblika (PR), Francisco Guteres Lu-Ólo iha Palasiu Prezidente Repúblika, Bairu-Pite

Iha enkontru ne’e, PJR informa kona-ba krimi sira ne’ebé mak akontese iha teritóriu     Timor-Leste, vaga ofisiál justisa ne’ebé KSMP aprova ona no mós vizita hosi Prokuradór Repúblika hosi Estadus Unidus Amerika nian mai Prokuradoria Jerál Repúblika Timor-Leste.“Ohin halo enkontru ho PR, hodi informa kona-ba atividade ne’ebé MP hala’o durante fulan-Setembru nia laran to’o ohin loron, no KSMP mós aprova ona atu loke tan vaga ba ofisiál justisa sira hamutuk na’in-14, se mak intersante ho vaga Ofisiál Justisa nian ne’e bele partisipa iha konkursu ida-ne’e”.

Aleinde ne’e PJR mós hateten tan katak “informa mós ba PR kona-ba vizita ida hosi kolega Prokuradór Repúblika ida hosi Estadus Unidus Amerika nian ne’ebé mai Prokuradoria Jerál Repúblika, vizita refere ne’e organiza hosi Embaixada EUA nian. Entre EUA ho Prokuradoria Jerál, ami iha ona kooperasaun servisu durante tinan sanulu. Hosi rezultadu kooperasaun ne’e, ita-nia Prokuradór barak mak hetan ona benefísiu hanesan balun ba tuir ona formasaun iha rai-li’ur no rai-laran, no liuhosi ida-ne’e bele ajuda no eleva ita-nia Prokuradór no mós Ofisiál Justisa sira kapasidade.

PJR mós informa kona-ba kazál Timoroan na’in-rua ne’ebé hetan detensaun tanba kazu droga iha Indonézia-Atambua iha fulan hirak liubá, oras ne’e sira-nia estatutu muda ona ba prizaun preventiva no ita he’in prosesu tuirmai, iha parte ida governu bele haree iha posibilidade saida mak bele halo hodi fo tulun  ita-nia sidadaun ne’ebé komete krimi iha estranjeiru, inklui mós kazu omisídiu estudante Timoroan iha Indonezia-Yogyakarta, autoridade Indonézia sira detein ona ema na’in-tolu ho estatutu prizaun preventiva.

“Se mak bele toma kota? loloos mak governu, governu bele haree tanba arguidu sira-nia familia mós hili ona advogadu, maibé, governu mós bele haree posibilidade saida mak bele halo hodi fó tulun  ita-nia sidadaun ne’ebé komete krimi iha estranjeiru”.

Tuir Prokuradór-Jerál  prosesu investigasaun ba sidadaun Timoroan sira ne’e kontinua la’o, ami  nia parte kontinua hakbesik-an ba autoridade Indonézia sira liuhosi Embaixada Timor-Leste iha Jakarta, hodi hato’o disponibilidade ba prosesu investigasaun konjunta entre autoridade nasaun rua ne’e. (Media PJR).