SUAI – Prokuradoria Repúblika Distritál Suai (PDS) fahe informasaun kona-ba knaar Ministériu Públiku (MP) nian ba lideransa komunitária sira iha Munisípiu Kovalima. Programa formasaun ne’e, ne’ebé realiza liu hosi projetu Ba Distritu, hala’o iha salaun enkontru PDS nian iha Tersa-Feira (31/01/2017).
Eventu ne’e hetan partisipante sira na’in 31, fahe ba grupu tolu, kompostu hosi xefe suku, xefe aldeia no mós delegadu suku sira hosi Kovalima, no Prokuradór Repúblika Bartolomeu Araújo mak hanesan formadór. Iha oportunidade ne’e, aleinde hatoo informasaun kona-ba ezisténsia no knaar MP nian, esplika mós kona-ba funsionamentu Sistema Justisa, ho knar polísia, tribunál/ juís sira-nian, no defensór públiku ka advogadu sira-nian. Hafoin sesaun informasaun hotu, partisipante sira mós hetan oportunidade atu vizita mós instalasaun servisu PDS nian.
Durante formasaun ne’e, partisipante sira hatoo katak maske tempu limitadu teb-tebes, iha oras ida nia laran sira hetan esplikasaun ne’ebé simples no permite sira bele komprende kona-ba saida mak Justisa, liu-liu servisu Ministériu Públiku ninian, no oinsá mak líder komunitáriu sira bele kontribui servisu hamutuk ho MP hodi fasilita komunidade nia asesu ba justisa. Sira mós husu ba formadór sira atu bele dertermina tempu tan ba futuru hodi bele haklean sira nia koñesimentu kona-ba Sistema Justisa no servi komunidade ho di’ak liu tan.
Projeto Ba Distritu ne’e hetan fundus hosi Ajensia Estadus Unidas ba Dezenvolvimentu Internasionál (akrónimu hosi inglés, USAID), no implementa hosi Counterpart International. (Media PGR)