AINARO – Ministériu Públiku (MP), liu hosi Prokuradoria ReDistritál Suai (PDS), kontinua nafatin hala’o programa formasaun ba Polisía Nasionál Timor-Leste (PNTL) hodi haforsa servisu hamutuk no kapasitasaun, liu-liu kona-ba Lei sira ne’ebé relevante ho servisu loro-loron nian ne’ebé mak membru PNTL sira hala’o iha terenu. Iha tinan-2017 ne’e, MP mós foka hodi bele fahe informasaun relasiona ho eleisaun sira prezidensiál no lejislativa, iha fulan-marsu no jullu, liu-liu krime eleitorál no prosedimentu sira tuir saída mak determina iha Kódigu Penál no Kódigu Prosesu Penál.
Segundu Komandante PNTL Eskuadra Munisípiu Ainaro, Albino Mauzino, agradese tebes ba Prokuradoria Distritál Suai tanba bele hasoru malu fila fali hodi loke tan koñesimentu kona-ba Lei sira ne’ebé vigora iha Timor-Leste ba iha PNTL Ainaro.
“Ita ohin iha oportunidade di’ak tebes tanba bele hasoru malu fali ho Prokuradór Distritál Suai nian, ne’ebé sai hanesan formadór hodi loke ita nia koñesimentu relevante ho ita nia servisu, hanesan adjuntu komandante ha’u agradese ba Prokuradór Distritál Suai mai iha ne’e hodi fornese sira nia koñesimentu. Ohin hanesan loron ida ne’ebé fanu ita no fó hanoin fila fali mai ita oinsá atu buka hatene liu, karik ita la komprende ita tenke husu tanba sesaun formasaun sira ne’e hanesan oportunidade osan mean”, dehan Segundu Komandante iha segunda-feira (06/03/2017), durante abertura ba formasaun, ne’ebé hala’o iha sala PNTL Ainaro.
Segundu komandante ne’e informa liu tan katak formasaun sira hanesan ne’e ba PNTL sira importante tebes mós tanba tempu besik ona sira atu tuir fali iha prosesu promosaun, no formasaun refere sai hanesan oportunidade atu aprende tan no hanoin fila fali matéria hodi bele partisipa iha prosesu promosaun ho di’ak.
Tuir Prokuradór Distritál Suai, Dr. Matias Soares, mós informa liu tan katak formasaun ne’e hanesan atu fahe informasaun oinsá atu partisipante sira ida-idak hatene bainhira halo servisu loro-loron iha komunidade sira nia le’et, inklui relasiona ho eleisaun sira prezidensiál no lejislativa.
“Loron ohin ami enkontru ho ita boot sira atu fahe informasaun ba ita boot sira nia servisu lor-loron liga ba komunidade sira, haklean koñesimentu kona-ba baze legál ne’ebé mak ita iha no oinsá nia prosedimentu para atende krime sira, liliu ba Kódigu Penál ho Kódigu Prosesu Penál”, tenik Dr. Matias Soares.
Iha fatin hanesan, partisipante Henrique de Jesus Carvalho hateten katak nia sente kontente tebes tanba hetan informasaun hosi Prokuradór Distritál Suai hodi bele prepara hodi hala’o ninia servisu hanesan polísia ho didi’ak, liu-liu relasiona ho prosesu eleitorál sira ne’ebé sei realiza durante 2017.
“Ita hotu hatene katak agora besik ona ba Eleisaun no mós ami nia líder komunitáriu sira sei foun, ho ida ne’e mak buat ne’ebé mak ohin ami simu ami sei hatutan ba ami nia líder komunitáriu sira no mós ami sei hala’o tuir Lei sira hanesan Prokuradór ohin esplika, ho ida ne’e mak ami iha Eskuadra Ainaro husu tulun nafatin no komunika ba Prokuradór sira karik ami hetan failla ruma iha ami nia servisu”, tenik Henrique Carvalho.
Iha formasaun ne’e hetan partisipante hosi PNTL Ainaro inklui Ofisiál Polísia Suku sira, Taskforce, Tránzitu no mós Investigasaun sira, hamutuk ema na’in 29. Antes atu formasaun ne’e remata, Prokuradór Distritál Suai mós entrega Revista Ministériu Públiku nian ho Kalendáriu MP 2017 ba Segundu Komandante Eskuadra Munisípiu Ainaro. (Média PJR)