LIKISÁ –Sesta-feira (16/12/2016) foin lalais, Ministériu Públiku (MP) halo destruisaun droga ba dahuluk ho kuantidade 3.991 kilograma, iha Munisípiu Liquisá. Okaziaun ne’e akompaña hosi Prokuradór-Jerál Repúblika (PJR), Dr. José da Costa Ximenes, hamutuk ho Adjunta Prokuradór-Jerál Repúblika (APJR), Dra. Zélia Trindade, Inspetór MP, Dr. Arlindo Figueiredo e Silva, no Prokuradór Repúblika sira ne’ebé servisu iha Gabinete Sentrál ba Kombate Korrupsaun no Kriminalidade Organizada (GSKKO), aleinde Servisu Investigasaun Kriminál Polísia Nasionál Timor-Leste nian (SIK-PNTL) no Polisía Sientifíka Investigasaun Kriminál (PSIK).
Tuir PJR katak, droga sira ne’e mai hosi aprensaun ne’ebé rezultadu hosi koperasaun di’ak entre MP, PNTL no PSIK.
“Iha tinan 2014 ita halo operasaun, konsege kaer arguidu nain ha’at ba iha prosesu tolu, arguida Sriyanti no Nuriyadi ita kaer iha Aeroportu Internasionál Nicolau Lobato ida-idak ho 1,100 kilograma droga sabu-sabu kristal, nune’e mós arguidu Iksan Darmawan tama hosi fronteira Batugade, PNTL ho ita nia komunidade sira akompaña depois nia tama to’o Dili mak sira kaer nia ho objetu droga ho tipu sabu-sabu kristal 1,600 kilograma”, PJR deklara hafoin destruisaun ba droga refere.
PJR hatutan tan, arguidu nain tolu ne’ebé mai hosi Indonézia sira ne’e iha prosesu investigasaun hatudu katak arguidu hirak ne’e tama iha sindikatu internasionál ba droga.
“Sira na’in tolu ne’e Tribunál kondena tiha ona, arguida Sriyanti pena prizaun tinan 15, Nuriyadi pena prizaun tinan 13 fulan neen no arguidu Ikhsan Darmawan pena prizaun tinan 10”, PJR dehan.
PJR realsa tan katak iha tinan-2014 nia laran mós iha sidadaun timoroan ida naran Venâncio Madeira ne’ebé mak kaptura liu hosi buska no aprensaun ba ninia rezidénsia Bidau Akadiruhun, durante buska ne’e konsege apreende tipu droga sabu-sabu ho ekstazi, nune’e nia hetan pena prizaun tinan hitu. aliende ne’e PJR mos apela ba Timoroan sira atu labele komete ba iha droga tamba droga bele estraga ita nia saude no ita nia futuru.
“Hau husu ba maluk timoroan no foinsa’e sira atu labele tama ba iha droga tanba droga ne’e hanesan ai-moruk ne’ebé la di’ak no bele estraga ita nia saúde nune’e mós estraga ita nia futuru rasik”, PJR deklara.
Iha fatin hanesan, Komandante SIK-PNTL, Ludgerio Pedro Madeira Lay, deklara katak hosi parte polísia sei kontinua halo koordenasaun di’ak ho MP hodi halo sosializasaun ba eskola sira kona-ba droga ninian nune’e mós husu ba MP atu fó apoiu nafatin servisu investigasaun kriminál ninian.
“Dezde inísiu kedas servisu investigasaun kriminál ho MP iha ona akordu ida oinsá atu halo sosializasaun ba eskola sira kona-ba droga ninian liu hosi Polisía Komunitária no mós halo sosializasaun ba suku sira, oinsá ho droga ninia efeitu, ita mós haree katak durante ne’e MP kontinua fó apoiu makas ba investigasaun kriminál nian iha kualker momentu karik iha buat ruma sempre prontu apoiu ami”, hatutan Lay. (Media PJR)