Dili-Prokuradór-Jerál Repúblika, (PJR), Dr. José da Costa Ximenes, iha Tersa,     loron12, fulan-Fevereiru, tinan2019, hala’o enkontru ho Prezidente Repúblika (PR), Dr. Francisco Guterres Lu-Olo, hodi informa atividade ne’ebé Ministériu Públiku (MP)  hala’o durante fulan Janeiru to’o Fevereiru, iha Palásiu Prezidente Bairro-Pité.

Iha enkontru ne’e, Prokuradór-Jerál Repúblika informa ba Prezidente Repúblika kona-ba situasaun kriminalidade ne’ebé akontese iha Timor-Leste, liuliu iha Munisípiu Baucau, Dili no Liquisa, nune’e mós kona-ba krimi falsifikasuan dokumentu ne’ebé komete hosi funsionáriu balun ne’ebé servisu iha STAE, Komisaun Ómenajen no Banku balun.

Kona-ba kazu ne’ebé akontese iha Munisípiu Baucau, MP koopera ona ho Polísia Nasionál Timor-Leste (PNTL), nune’e konsege kaptura ona autór ba krime ne’e, “kona-ba problema grupu arte marsiais ne’ebé akontese iha Munisípiu Baucau, Kera Sakti ho PSHT ataka malu, sunu uma no motorizada balun. MP hamutuk ho PNTL konsege aprezenta ona ema balun ba Tribunál nune’e aplika ona prizaun preventiva ba autór sira”, PJR kasu lia hirak ne’e ba Jornalista sira hafoin ramata enkontru ho Prezidente Repúblika.

PJR akresenta tan katak kona-ba akontesimentu iha Liquisa, prosesu investigasaun la’o hela, daudaun ne’e MP hamutuk ho PNTL Munisípiu Liquisa haree hela kestaun ne’e no iha tempu badak nia laran bele halo atuasaun ona.

Iha biban ne’e mós PJR konkorda ho Prezidente Repúblika nia deklarasaun kona-ba reativa filafali atividade arte marsiais, “ha’u konkorda ho PR nia deklarasaun atu reativa fali atividade arte marsiais nian, importante mak oinsá bele regulariza grupu sira ne’e, tanba balun loke balun taka, ne’e laiha dalan atu regulariza, entaun bele reativa filafali, maibé tenke kontrola didi’ak, selae ikusmai bele kria konflitu”.

PJR akresenta tan katak, “daudaun ne’e MP komesa promove atu ka’er ema balun iha STAE, Banku no Komisaun Ómenajen tanba ita hahú komesa deskobre ona grupu balun iha instituisaun sira ne’e halo falsifikasaun dokumentu hodi sai veteranu, nune’e mós ita tenke respeitu veteranu orijinál, maibé mós veteranu balun fó apoia fali ba atividade falsifikasaun  dokumentu” . Nia afirma tan katak,  “komunidade balun  trata dokumentu veteranu nian atu simu osan vinte mil maibé simu deit sete mil, balun dehan simu sinku mil, balu dehan simu treze mil  no restu ne’e grupu sira fahe ba malu deit, tanba dehan katak sira mak ajuda hodi trata dokumentu sira ne’e. Nune’e, husu ba sira ne’ebé mak sai ona vítima hosi hahalok autór sira ne’e atu hato’o keixa ba MP”. (Media MP)