Dili- Kuarta-feira, loron-20, fulan-jullu, tinan-2022, Adjunta Prokuradór-Jerál Repúblika, Dra. Remízia de Fátima da Silva hamutuk ho Prokuradór Repúblika Dr. Domingos Goveia hanesan titulár prosesu nian, entrega evidénsia kareta 5 ho marka, avanza velóz 4, kijang 1 ba Patrimóniu Estadu, enkontru ida-ne’e hala’o iha salaun enkontru PJR-kolmera.

Iha Fatin hanesan APJR Dra. Remízia de Fátima da Silva hatete, prosesu refere Tribunál Dili deside ona karreta hirak-ne’e lakon afavór ba estadu iha loron-30, fulan-marsu, tinan-2022, ho pena prizaun ba arguidu sira tinan ida fulan neen no arguidu ida hetan suspensaun ba tinan haat, no na’in-tolu seluk hetan suspensaun ba tinan tolu.

Importasaun ilísitu ba sasán sira ne’ebé mai husi rai-liur, arguidu sira hatama kareta dezde tinan-2015 kareta ida, iha tinan-2016 kareta tolu, kareta ho marka Avansa veloz tolu, kijang rua, kareta refere arguidu lori husi Munisípiu Covalima, Lebos no Tunubibi, arguidu sira servisu hamutuk ho ema indonésia hatama sasán sira-ne’e mai.

APJR husu ba instituisaun hotu-hotu atu bele tau matan no servisu hamutuk, hodi bele kontrola másimu fronteira sira atu nune’e redús importasaun ilegál sira. Iha hanoin atu halo negósiu ida-ne’e presiza halo tuir lei ne’ebé estabelese iha ita-nia rain. Ita tenke hanoin katak, atu buka lukru boot ita tenke respeita ita-nia lei no ita-nia Estadu rasik, no respeita mós instituisaun sira ne’ebé servisu iha fronteira.

Nune’e Prokuradór Repúblika Dr. Domingos Goveia hatete, ita la tuir de’it arguidu, ita mós presiza atu haree objetu ne’ebé arguidu hatama kareta 5: Marka Avansa 4,  kijang 1 mai ita-nia rain, ho ida-ne’e mak ita buka duni atu prosesa tuir lei objetu sira-ne’e hodi la bele estraga, nune’e tribunál deside liuhosi prosesu ida-ne’e sasán apreendidu sira lakon afavór ba estadu.

Nia esplika liután katak, prosesu ida-ne’e ninia andamentu naruk, Prokuradór Repúblika Dr. Hernani Rangel mak nu’udar titulár dahuluk ba prosesu ida-ne’e, nia mak hahú nu’udar primeiru Prokuradór titulár ba kazu refere, nia mak hahú hala’o investigasaun to’o julgamentu no iha desizaun rekursu hetan tránzitu enjulgadu hodi deklara lakon afavór ba Estadu,  kareta ne’ebé arguidu sira hatama ilegalmente mai iha ita-nia territóriu nasionál, ikusmai ninia prosesu maske demora uitoan maibé ita konsege hetan rezultadu ne’ebé di’ak no Tribunál deklara karreta ka objetu apreendidu sira-ne’e lakon afavór ba estadu.

 Iha fatin hanesan, Diretór Monitorizasaun no inspesaun Patrimóniu Estadu, Domingos Freitas hatete, ami apresia tebetebes ho servisu MP nian ba objetu apreendidu sira, kolaborasaun entre MP ho Ministériu Finansas liuhusi patrimóniu estadu hala’o di’ak tebetebes to’o momentu ida-ne’e,  ita hala’o ona aktividade lubun ida iha munisípiu sira hanesan Dili, Ermera, Suai. Maibé iha fatin seluseluk to’o momentu ida-ne’e, ami mós sempre tun bá hodi halo monitorizasaun no verifikasaun ba bein-movél sira ne’ebé iha liña ministériu sira hotu ami hetan informasaun katak kuaze munisípiu sira iha hotu sasán apreendidu hirak husi PNTL. Tanba ida-ne’e, ami apresia servisu MP nian no husu mós ba ita atu hala’o nafatin kolaborasaun (servisu hamutuk) hodi sasán apreendidu sira ne’ebé lakon afavór ba estadu sai nu’udar reseita ba kofre estadu (Media PJR).