Ermera-Segunda, loron-19, fulan-Outubru, tinan-2020, Prokuradór Repúblika, Dr. Simões Brites Seijas ho ekipa MP nian entrega motorizada-5 ba Patrimóniu Estadu.
Iha biban ne’e, Prokuradór Repúblika Dr. Simões Brites seijas hateten katak ohin MP entrega evidénsia hanesan motorizada lima ba patrimóniu estadu. Motorizada hirak ne’e Polísia Diresaun Tránzitu preende tiha bainhira sira halo autu stop iha tinan-2007 liubá, no barakliu mak laiha dukumentus komprovativu no laiha karta kondusaun, no iha tinan barak nia laran motor na’in sira la mai halo reklamasaun, nune’e, ikusmai prosesu ne’e hatama ba iha Tribunál hodi desidi tiha katak sasán sira ne’e afavór ba estadu. No ninia Númeru prosesu mak 0047/20 RSIK.
Iha sorin seluk, reprezentante husi Patrimóniu Estadu nian, Diretór Domingos Freitas hateten katak ohin ami simu ona motorizada lima husi MP no sasán sira ne’e afavór ba estadu, ho nune’e Patrimóniu Estadu sei jere buat ne’e tuir modalidade ne’ebé mak iha, balun ne’ebé mak di’ak sei halo transferénsia ba instituisaun governu nian ne’ebé presiza, no balun fali sei loke konkursu públiku liuhusi halo leilaun, nune’e, bele hatama fali reseitas ba estadu.
Ekipa ne’ebé mak partisipa iha atividade entrega motorizada sira-ne’e mak hanesan; Prokuradór Distritál Dili, Prokuradór Delegasaun Ermera, Diretora-Jerál PJR no Diretór Patrimóniu Estadu hamutuk ho ninia ekipa sira. (Media MP)