Dili-Kinta, loron-08, fulan-Outubru, tinan-2020, relasionadu ho komemorasaun aniversáriu MP nian ba dala-20, nune’e, família boot MP nian partisipa iha misa agradesimentu iha Igreja St. António Motael. Hafoin tiha misa, Prokuradór Jerál Repúblika Dr. José da Costa Ximenes ho ekipa sira Ministériu Públiku nian hala’o asaun karidade ba iha Asrama Alma, Pantai Kelapa. Asrama ne’e rasik halibur labarik difisiente sira hamutuk lima–nulu resin.
Iha vizita ne’e PJR hateten katak, ohin ami mai vizita asrama ida-ne’e tanba hakarak hasoru-malu ho alin ki’ik-oan sira, ami laiha buat folin boot ruma hodi lori oferese hela ba imi, ami só lori de’it buat ituan hodi fó hela ba imi, maibé importante mak ami bele hasoru-malu ho alin ki’ik-oan sira no hakarak partilla ho imi sira hotu no mós hodi haree direta kondisaun imi nian iha fatin ida-ne’e
PJR hatutan liután katak, Ministériu Públiku iha unidade espesializada ida ne’ebé hanaran Kuradória ba Menór no Família, liuhusi unidade ida-ne’e ami hakarak promove atensaun ne’ebé espesiál liu ba ki’ikoan sira no seluk-seluk tan ne’ebé mak ladún hetan atensaun husi parte seluk.
PJR fiar katak ba futuru, MP sei prepara tempu seluk hodi hakbesik-an ba ofornatus sira seluk hodi tenta buka sira ne’ebé vulneravél ne’ebé la hetan atensaun, no tenta buka oportunidade hodi bele fó mós atensaun, tanba dala barak ami servisu de’it ho prosesu no ladún hatene situasaun reál ne’ebé akontese ba vitima sira, hatete PJR.
Iha fatin hanesan, koordenadora Asrama Alma nian, Ir. Gabriela Alma, sente orgullu tebes ho vizita refere, “ami sente kontente tebes ho ita-boot sira nia vizita, ida-ne’e mak ami-nia uma, no ne’e mak ami-nia kondisaun no sira ne’e mak ami-nia oan ne’ebé kiak no mukit tanba kondisaun fíziku. Ami hato’o ami-nia agradese ba Aman Maromak tanba to’o biban ida-ne’e sei haraik mai ita buat hotu mesak furak de’it hodi ita bele hasoru-malu iha fatin ida-ne’e. Aleinde ne’e, ami mós agradese no hato’o obrigadu barak, tanba ita-boot sira hafoin sai hosi misa, bele mai vizita kedas ami iha fatin ida-ne’e, ami sente orgullu tebes ba ita-boot sira nia vizita ida-ne’e, nune’e bele haforsa ami-nia atendimentu ba maluk difisiente sira.
Madre Alma ne’e akresenta liután katak “ami-nia asrama sentrál mak iha Malang-Jawa Timur, ami-nia misaun iha Timor-Leste kompleta ona tinan-16, no ami-nia prezensa iha-ne’e atu tau matan ba maluk sira ne’ebé kiak ba fiar no kiak ba domin, tanba ne’e kada fulan ami sempre halo viajen ba área rurál sira hodi ajuda sira.
“iha Alma ne’e halibur labarik ki’ikoan sira ne’ebé difisiente, hanesan sira ne’ebé tilun-diuk, koa’lia la hatene, moras mentál, sira na’in-limanulu ne’ebé halibur hamutuk iha fatin ne’e, mesak difisiente hotu, ami halibur sira ne’e atu oinsá sira mós bele hetan asesu ba edukasaun, maibé tanba fatin la sufisiente, entaun, iha deit na’in-18 mak hela hamutuk ho ami iha Alma ida-ne’e, alin difisiente sira ne’e, ami nunka halo diferensia ho ami Madre sira, ami haree hanesan ami-nia oan rasik, ami hela hamutuk iha uma ida, han hamutuk, nunka husik sira mesak, tanba sira mak ami-nia rikusoin, laiha tan ida mak di’ak liu ona sira”.
Família boot MP nian ne’ebé mak hala’o asaun karidade ne’e inklui PJR, Adjuntu PJR, Inspetora MP, Prokuradór Distritál sira, majistradu no ofisiál justisa hamutuk ho funsionáriu MP nian. (Media MP).