Dili-Sabadu, loron-04, fulan-juñu, tinan-2022, relasionadu ho komemorasaun aniversáriu MP nian ba dala-20 hafoin Restaurasaun Independensia, nune’e, família boot MP nian partisipa iha misa agradesimentu iha Igreja Catedral Imaculada Conceição Hafoin tiha misa, Adjunta Prokuradór Jerál Repúblika Dra. Remizia de Fátima da Silva ho ekipa Ministériu Públiku nian hala’o asaun karidade ba iha Asrama Orfanato Anur, Asrama ne’e rasik halibur labarik feto hamutuk tolunulu resin.

Iha vizita ne’e APJR hateten katak, ohin ami mai vizita asrama ida-ne’e tanba hakarak hasoru-malu ho alin sira, ami laiha buat folin boot ruma hodi lori no oferese hela ba imi, ami só lori de’it buat ituan hodi fó hela ba imi, maibé importante mak ami bele hasoru-malu ho alin sira no hakarak partilla ho imi kona-ba situasaun ne’ebé hasoru, ami mai hodi haree direta kondisaun ne’ebé imi infrenta ba.

Iha fatin hanesan, koordenadora Asrama Orfanato Anur, M. Anwar da Costa, sente orgullu tebes ho vizita refere, “ami sente kontente tebes ho ita-boot sira nia vizita, ida-ne’e ami-nia kondisaun mak ne’e. Ami hato’o ami-nia agradese ba Aman Maromak tanba to’o biban ida-ne’e sei haraik mai ita buat hotu mesak furak de’it hodi ita bele hasoru-malu iha fatin ida-ne’e. Aleinde ne’e, ami mós agradese no hato’o obrigadu barak, tanba ita-boot sira hafoin sai hosi misa, bele mai vizita kedas ami iha fatin ida-ne’e, ami sente orgullu tebes ba ita-boot sira nia vizita ida-ne’e, nune’e bele haforsa ami-nia atendimentu ba labarik sira.

Nia hatutan tan katak, Asrama labarik sira hamutuk na’in-30 feto hotu, mak hela hamutuk iha ne’e, alin sira ne’e, ami nunka halo diferensia ho ami, ami haree hanesan ami-nia oan rasik, sempre fó hanoin hodi estuda no ami haree sira ninia han ne’ebé mak di’ak , nunka husik sira mesak, tanba sira mak futuru nasaun ne’e nian. Ami nia edifisiu foun foin hahu konstrusaun sedauk remata, tinan oin mai ami sei iklui asrama mane sira hotu, maibe agora ami nia kondisaun mak ne’e ami so bele simu de’it ituan hodi bele haree.

Hafoin halao tiha asaun kariedade ba orfanato Anur,  komitiva balun hamutuk ho Prokuradór Jerál Repúbika (PJR), Dr. Alfonso Lopez halo mós vizita ba orfanato Catolico Lar Bom Samaritano ne’ebé lokaliza iha Munisípiu Ermera Lauala.

Iha vizita ne’ebé liu hosi asaun kariedade hosi pesoál majistradu, ofisiál justisa no funsionáriu sira, ida ne’e hanesaun asaun karideade ida hodi komemora loron aniversáriu Ministériu Públiku nian ba dala rua nulu hafoin restaurasaun independénsia.

Vizita refere simu ho kontente hosi estudante sira ho Diretor Lar nian, nune’e Diretór ne’e mós hato’o nia obrigadu no agradese ba Apoiu MP nian ba dala ida ne’e, nune’e mós, molok komitiva husik hela fatin ne’e, PJR rai hela mensajem katak,”alin sira mak futuru nasaun nian, aban bairua imi mak sei troka ami sira ne’e, nune’e husu ba imi atu nafatin estuda no fokus ba eskola tanba ita nia estadu mós garantia imi nia direitu no liverdade.

Família boot MP nian ne’ebé mak hala’o  asaun karidade ne’e inklui  PJR, Adjunta PJR, Inspetora MP, Prokuradór Distritál sira, majistradu no ofisiál justisa hamutuk ho funsionáriu MP nian. (Media PJR).